Lok Sabha inthlana hna thawk ṭhate Election dept.-in lawmman an hlan
Kumin Lok Sabha inthlanpui puala intihsiakna - district election officer (DEO) zinga mipui hnena vote thlak pawimawhzia inzirtirna kawnga hmala ṭha berah Khawzawl district thlan niin, polling station zinga vote tla tam ber lawmman chu Keifangtlang polling station BLO Lalhmingliana hnenah hlan a ni.
Nimin khan Aijal Club-ah Chief Electoral Officer (CEO) office chuan kumin Lok Sabha MP inthlanpui puala mipui hnena vote thlak pawimawhzia inzirtirna kawnga hmala ṭha intihsiakna (District-Level SVEEP and Media Competition) leh vote tla a tam theih nana BLO-te intihsiakna (Voter Turnout Competition)-a ti ṭhate hnenah lawmman semna hun a buatsaih a; additional CEO Dr H Lianzela chu khuallian a ni.
Dr H Lianzela chuan, democracy ramah chuan mipui ta, mipui len theihna sorkar ṭha tak a awm a ngai tih a sawi a, "Hemi a thlen theihna tur hian kum bithliah (kum 18) chinte ram hruaitu thlang thei tura ruahman a ni a, mipui a tam thei ang berin vote an thlak theih nan theihtawp kan chhuah a, hemi kawnga inelna kan siam min hlut sak avang hian district tina DEO leh an thawhpuite, BLO zawng zawngte, MPF, NGO, media-te leh Election department hotute chungah lawmthu ka sawi a ni," a ti.
Lok Sabha inthlanpui ala kal mek avangin India ram puma vote tlak dan a la hriat theih chiah lo tih sawiin H Lianzela chuan, "Mizoram bikah chuan tun aia ṭha zawka vote a tlak ṭhat lehzual theihna atana ruahmanna thar siam dan turte pawh ngaihtuah thar tur tam tak a awm a, a bik takin electoral roll dik leh felfai tak kan neih theih nan BLO-te leh Election official-ten grassroot level-ah ṭan kan lak thar a pawimawh," a ti a; inthlan felfai leh thianghlim, buaina lian tham awm loa neih a nih theih avangin inthlan buaipuitute leh mipui chungah lawmthu a sawi.
District-Level SVEEP and Media Competition-ah hian pakhatnain Rs 30,000, pahnihnain Rs 20,000 leh pathumnain Rs 10,000 an dawng a; Voter Turnout Competition-ah hian pakhatnain Rs 8,000, pahnihnain Rs 7,000 leh pathumnain Rs 6,000 bakah, a tiṭhazual pasarih hnenah Rs 6,000 ṭheuh hlan a ni a, an vai hian chawimawina thuziak an dawng a ni.
District-Level SVEEP and Media Competition
1-na Khawzawl district
2-na Lawngtlai district
3-na Kolasib district