Tím miah loa mipuite dàwt hrilh ṭhinah MNF Ṭhalaiin Chief Minister an puh

Mizo National Youth Front (MNYF) Gen. Hqrs. president Robert Romawia Royte, MLA hoa MNYF Sub Hqrs, Lunglei; MNYF District Hqrs MADC, LADC leh CADC hruaitute Lawngtlaia May 14, Thawhlehnia ṭhu­khawm chuan tím miah loa dàwt sawi ṭhinah chief minister Lalduhoma an puh.

MNYF chuan, dawt a sawi ṭhin avanga Lalduhoma chu an dem thu tarlangin, "Dawt sawi fo tawh lo turin kan ngen a ni. Nikum SASCI part-I 2023-24 first instalment sum hi a implementing dept.-ah pe chhuak nghal turin ZPM sorkar hi kan phût. An pe chhuak lo a nih chuan a ṭul angin hma kan la ang. SASCI sum an suasam dan hi kan enzui zel dawn," an ti.

MNYF tarlan dangte

☑ CM zahawm tak Lalduhoma hian an sorkar tirha press conference a neihah SASCI sum chu single nodal agency (SNA)-ah dah vek tawh angin dawt chiang tak a sawi. MNYF-te'n kan chhui chianin SASCI sum a sawi hi SNA account-ah May 8, 2024 thleng khan dahchhuah a la ni lo. K-deposit ah Finance dept.-in an la kawl tang reng zawk tih hmuhchhuah a ni.

☑ May 3, 2024-a CM office-a a press conference neihah kum 2022-23 kuma cheng nuai 40,000 sanction aṭanga cheng nuai 20,000 chu lapse angin a sawi. Hei pawh hi dawt chiang tak a ni. Cheng nuai 40,000 hi central sorkarin a rawn release kim vek. Hna pawh cheng nuai 40,000 man thawh niin bill pawh pek a ni.

☑ Kum 2023-24 a 2nd instalment sum cheng nuai 23,331 lapse chungchangah pawh dawt sawiin MNF sorkar tih lapse an ti leh ngawt pek. He sum lapse-na chhan chu 1st instalment cheng nuai 26,669 chu ZPM sorkarin financial year tawp ni March 31, 2024 pel rawka dan kalha kawl tanga a implementing agency-a a pekchhuah loh vang a ni. SASCI guidelines ang chuan sum dawn ni aṭanga ni 10 chhungin Finance dept.-in 1st instalment sum hi a hmang/pe chhuak tur a nih laiin, ZPM sorkarin Finance dept.-a K-deposit-a an kawl tlat vangin 2nd instalment tur cheng nuai 23,331 chu a rawn chhuak thei loa, a lapse ta a ni zawk.

☑ CM zahawm takin ama tih dik lohah midang puh a ching hi a Mizo loa, hotupa ber tih chi a ni lo. SASCI sum dere pawh pek chhuah a nih loh lai leh contractor-te nasa taka tih khawtlaia an hnate cut sak an nih laia sum lapse chhana implementing dept. leh contractor-te puh an ni hian ZPM sorkar hi mawhphurhna la ngam lo sorkar a nih zia a tilang chiang hle. Hnathawhna tur sum chengkhat mah pe chhuak si loa mi dang puhmawh tur a zawng hi chìn dan ṭha lo tak, CM dangte tih ngai loh a ni.