HSLC result-ah CYMA a lawm

Central YMA chuan thuchhuah siamin, Mizoram Board of School Education (MBSE)-in May 14, 2024-a High School Leaving Certificate 2024 result tluang taka a tichhuak chu lawmawm an tih thu leh pass percentage 73.37% a tling chu lawmawm an tih thu an tarlang.

HSLC exam hma­chhawntu zinga mi 13,618 (73.37%) an hlawhtling chu lawmawm an tih thu sawiin CYMA chuan, "Pass zawng zawngte kan lawmpui tak zet. An zir leh zelna turah ram leh hnam rilru pu chunga chhunzawm zel turin duhsakna kan hlan. Tun ṭuma hlawhtling ve ta rih lote pawh hnual mai loin theihtawp chhuah zel turin kan ngen bawk," an ti.

CYMA chuan, HSLC result tihchhuah a nih theihna tura thawktu MBSE chungah an lawm thu leh kum 2023 aia result 2.23%-a a ṭha zawk chu hmasawnna lawmawm tak a nih thu an tarlang a; ṭhahnemngai taka thawktu zirtirtu leh thawktu dangte chungah an lawm thu an sawi rualin, Mizoram zirnain hma a sawn zel nan theihtawp chhuah zel turin an ngen a ni.