Medical officer-te tan training buatsaih

National Health Mission (NHM), Mizoram chuan May 14-15, 2024 khan Health Services conference hall-ah Lunglei, Siaha Champhai, Lawngtlai leh Mamit district-a damdawi-in hrang hranga medical officer-te leh Health and Wellness officer-te tan 'Training of trainer on ASHA refresher training' an buatsaih.

Training hi NHM mission director Dr Eric Zomawia'n a hmanpui a; medical officer-te chu state ASHA trainer-te leh Regional Resource Centre - North East (RRC-NE), Guwahati-a mite'n thil pawimawhte an zirtir a ni. Training-a telte hian anmahni bial ṭheuha ASHA-te training an neihpui ve leh ang.

India ramah accredited social health activist (ASHA) mi 9,83,000 an awm a, Mizoramah mi 1,091 an awm mek. ASHA-te hi Health department leh mipui zawmtu pawimawh tak an ni a; Health department hmalakna hrang hrang - naute leh nu hriselna, sikserh, natna inkai chhâwn theih loh leh thil dangahte an awmna khaw mipui tan an thawk ṭhin a ni.