CM leh MCCI hotute an inkâwm

Chief minister Lalduhoma leh Mizoram Chamber of Commerce & Industry (MCCI) hotute nimin khan CM pisaah an inkawm a, MCCI-in commerce leh industry lama Mizoram hmasawnna tur rawtna an neih an sawiho.

MCCI hruaitute chuan, Mizorama coope-rative society hmanga mipui tana awlsamna thlen theih dan te, mau behchhan industry dintute tana dàwr ber tur department neih ṭul an tih thu te, industrial area chungchang te, consultancy firm leh register contractor-te inkara harsatna awm thei te, tender chhangtute tana work done certificate phût chungchangte an thlen.

Mizoram chu financial literacy rate a hniam avanga bank loan lâk a har thu te, Inner Line Permit kalpui dan ṭha nia an hriat te, SRI scheme leh handholding policy kal kawptir theih dan tur te, Bangladesh nena insumdawn tawnna chungchang leh thil pawimawh dangte an thlen bawk.

CM Lalduhoma chuan, MCCI rawtnate chu an lo zir chian tur thu a sawi a; rawtna ṭhenkhat chu chipchiar taka ziaka thlen leh turin a chah a ni.