Cheng nuai 268 tichingpena puh MAMCO dy. manager hlui an man

Cheng nuai 268 tichingpena puh, MAMCO deputy manager hlui Lalremthanga chu May 14, 2016 khan Anti Corruption Bureau (ACB)-te'n an man a, Central Jail-ah dah nghal a ni.

Lalremthanga hian Court-ah anticipatory bail a dil a, April 29, 2016 khan District & Session Court chuan interim bail a pe tawh. May 13 khan anticipatory bail a dilna ngaihtuah leh a ni a, Aizawl District & Session judge Lucy Lalrinthari chuan a hnâwlsak a; ACB chuan May 14 chawhma lam khan Lalremthanga chu man nghalin, Court thu angin Central Jail-ah dah luh a ni.

Lalremthanga anticipatory bail dilna ngaihtuahnaah hian sorkar ukil H Lalmuankima chuan, Lalremthanga thil tih chu thil serious tak a nih thu a sawi a, bail phalsak lo turin Court a ngen.

District & Session Judge chuan, Lalremthanga ukil leh sorkar ukilte thu a ngaihthlak hnuah, sorkar ukil thusawi, 'Lalremthanga puhna hi thil serious tak' tih chu dik a tih thu a sawi a, "Anticipatory bail dilna hi hnawl a ni," a ti.

Thu dawn danin, Lalremthanga hi MAMCO deputy manager ni chunga managing director mawhphurhna a lak lai, April 4, 2012 aṭanga June 6, 2014 inkar chhungin Mizoram khaw ṭhen-khata Kendra Vidhyalaya sakna tur atan contractor ṭhenkhat chu hna pek tiamin, MAMCO hmingin cheng nuai 268 a laksak a; nuai 268 chu tichingpena puh a ni. Lalremthanga lakah hian December 3, 2015 khan ACB-ah FIR ziah luh a ni.

ACB-in an chhuinaa a lan dan chuan, Lalremthanga hian cheng nuai 268 chu mi hrang hrang hnen aṭangin MAMCO hmingin a la a, mahse, pawisate chu MAMCO account-a dah loin, Lalremthanga thurualpui Mustagur Rahman account-a dah a ni. Hei vang hian Lalremthanga chu mi bum leh a thuneihna hmangsuala sum tam tak tichingpenah puh a ni.

Puh a nih dan chuan, Lalremthanga hian pawisa chu mi hrang hrang pasarih hnen aṭangin a la a; sum a lak dan chu - cheng nuai 45, nuai 44, nuai 35, nuai 30, mi pahnih hnen aṭangin nuai 25 leh nuai riatte a ni.