Rangkachak rûkbo thubuai: Muanawma leh Bulaki Baid bail-in chhuah

Rangkachak tawlhrûk suam leh rûkbo thubuaia police-in an man, Lalmuanawma Mathipi, Zonuam, Aizawl leh Bulaki Chand Baid, Laipuitlang-te chu Aizawl District Court-in thla khat chhung atan bail-in a chhuah.

Lalmuanawma Mathipi leh Bulaki Chand Baid-te hian bail an dil a, an dilna chu May 13, 2016 khan ngaihtuah a ni. An ukil Francis Vanlalzuala chuan, a client-te chu kumin April 22 leh 23 man an nih thu sawiin, "Vawiin thlengin judicial custody-ah dah an ni. An pahnih hian zunthlum leh thiesen sang nei an ni a, Lalmuanawma Mathipi phei chu a lung zai tawh a ni," a ti.

Francis Vanlalzuala sawi danin, Lalmuanawma leh Bulaki Chand Baid-te chu an damloh vangin Central Jail-a doctor-in Aizawl Civil Hospital-ah a thawn a; an dinhmun a ṭha lo a, jail páwn lama enkawl vat an nih loh chuan jail-a an thih mai a hlauhthawnawm a ni.

Sorkar ukil H Lalmuankima chuan, an thubuai chu thil serious tak a ni tih sawiin, "Investigation a la zo lo a, anni pahnih hian mi tam tak hna thawk turin an ruai nia sawi a ni a, bail-a chhuah an nih chuan an thunun thei ang tih a hlauhawm," a ti a; bail an dilna chu phalsak lo turin Court a ngen.

Aizawl District & Session judge Lucy Lalrinthari chuan, Lalmuanawma leh Bulaki-te ukilin medical prescription a thehluh chuan zunthlum leh thisen sang an nei tih a tihchian thu sawiin, "Judicial custody páwna enkawl an nih loh chuan jail chhunga harsatna an tawh palh a hlauhawm," a ti a, medical leh humanitarian ground-in thla khat chhung bail a phalsak thu a sawi.

District & Session Judge chuan, Lalmuanawma Mathipi leh Bulaki Chand Baid-te chu bail-a an chhuah chhungin Court-a regular taka kal turin a hrilh a, Court phalna loin Aizawl an chhuahsan tur a ni lo a, finfiahna tihchhe zawngin an khawsa tur a ni lo.