Ṭawipui South-in NH-54 kawngpui dan tum ṭhulh

Lunglei district-a Ṭawipui South khawtlangin NH-54 kawngpui siam mekah an khua kal kân duh loh lantirna leh an khaw chhunga kawngpui siam ve thuai tura phût nana NH-54 kawngpui dan an tum chu an ṭhulh.

Kawngpui dan hi Ṭawipui 'S' V/C leh NGO Coordination Committee huaihawta neih tum a ni a; Ṭawipui S' Joint YMA president C Zohlimpuia chuan, May 13, 2016 tlai khan Ṭawipui V/C House conference hall-ah PWD executive engineer Pazawna leh officer dangte nen an inbia a; an thil phût tihhlawhtlin an tum thu PWD hotute'n an sawi avangin kawngpui dan chu an ṭhulh ta a ni.

C Zohlimpuia sawi danin, PWD hotute nen an inbiaknaah hian, PWD hotute chuan kawngpui siam hna thawktu ABCI hotute sawipui an tum thu an sawi a; tun kar aṭangin Ṭawipui 'S' khaw huam chin, kawng km. 3 vela thui chu blacktop ṭan theih an tum tur thu an sawi bawk.