KHAWTHLIR

Thisen pe

Aizawla Ṭhalai Kristian Pawl (ṬKP) Coordination Committee chuan an kum 25-na, silver jubilee pualin Inrinni khan Electric Veng BCM biak-inah thisen pek rûnpui an huaihawt a, Aizawla ṬKP member mipa 195 leh hmeichhia 30-te'n Aizawl Civil Hospital tan thisen unit 225 an pe. Inrinni vek khan Kulikawna Hmunthar Branch KṬP chuan an silver jubilee lawm nan Synod Hospital tan thisen unit 26 an pe a, a petute mipa 16 leh hmeichhia 10 an ni.

Thingin delh hlum

H Lalhlunthanga (58), Kawnpui Venglai chu May 13 tlai khan ruahsûr laia thli tleh vanga thing tluin a delh hlum. Thu dawn danin, H Lalhlunthanga hi Hortoki kawnga an huana a feh chu tlaiah a haw mai loh avangin a chhungte'n an ngaihven a, an thlám bula thing tluin a delh hlum tih an hmu ta a ni. Thing tlu hian thlám pawh a delh chhe hle a ni.

BEDC man

Champhaia Excise & Narcotic department leh Custom department mite joint operation chuan, Inrinni zing dar 2:30 vel khan Myanmar rama zu siamna chi khat, BEDC litre 756 an man a; a neitua puh mi pathum leh an phurhna maxicab leh taxi an man tel bawk.

Lehkhabu tlangzarh

Darrokima lehkhabu thar, 'Vul lai chul hnu' tih chu May 13, 2016 khan Sialsuka an inpuiah tlangzarh a ni. Lehkhabu hi Rs. 150 man tur a ni a; a chhungah mi hrang hrang chanchin lakkhawm te, thawnthu tawite leh seminar paper-te a awm.

Silver jubilee lawm

Aizawla ṬKP Coordination Committee chuan, May 13-15, 2016 chhung khan an kum 25-na, silver jubilee an lawm. Jubilee hi BCM Electric Veng biak-inah an lawm a; May 13 zanah jubilee mei an dêt a, Inrinni zan leh Pathianni nilengin hun an hmang bawk.

Pentikos Ni

Nimin Pathianni kha Pentikos ni a ni a, Mizorama kohhran hrang hrangin an hmang. Pentikos ni hi Easter Sunday aṭanga chhiara ni 50-na a ni. Vawiin hi Whit Monday a ni a, Mizoram Synod Office leh Synod department hrang hrangte chu an châwl ang.