MCAB-in mi 11,483 hnenah loan an pe tawh

Mizoram Cooperative Apex Bank (MCAB) chuan, March 31, 2016 thleng khan mi 11,483 hnenah loan an pek chhuak tawh.

Kohhran hrang hrang hnenah biak-in sakna atan cheng nuai 13,889.03 an pe chhuak tawh bawk a; MCAB hotute chuan, kohhrante'n loan a hun taka an rulh vek thu an sawi.

MCAB hotute chuan, Mizo mipuite'n eizawnna ngêlnghet an neih theih nan te, ni tin khawsak inrêlbàwlna lama mipuiin hma an sawn theih nante loan an pek chhuah ṭhin thu an sawi a, mipuiin an hnena sum an dahte chu mipui hnenah tho loan hmangin an sem chhuak nasa niin an sawi.

MCAB hotute sawi danin, March 31, 2016 thleng khan an hnena account nei zat chu mi 1,17,795 an ni a, chu'ng aṭanga pawisa an dawn tling khawm zat chu cheng nuai 59, 202.46 a tling. Tun dinhmuna sum an hmuh zawng zawng aṭanga loan an pek chhuah zat chu 67.63% a ni.

Apex Bank hian loan chi hrang hrang 12 an pe chhuak mek a, loan chi hrang hrang an pek chhuah aṭanga loan latute'n an la bat mek chu cheng nuai 40,038.95 a ni.

Tun hmain society leh mimal hnena loan an pekte'n an rulh
ṭhat loh avangin harsatna an tawk
ṭhin a, society hrang hrang phei chu sorkarin a chhanchhuah hialte an awm avang leh sorkar pawhin guarantor-ah ṭan a duh tawh loh avangin eng emaw chen loan pek an ni tawh lo tih an sawi. Mimal loan an pekte pawh kum 1990 vela mite chuan an rûl ṭha tâwk lo tih an sawi bawk.

Tun hnaiah erawh chuan mimal hnena loan late zingah 70% vel chuan an rûl ṭha niin an sawi a, "A tira Rs. 50,000 vel kan pekte pawh tunah chuan Aizawla pa hausa pawlte an awm tawh," an ti a; mimal hnenah cheng nuai 70 thlengte pawh pek an nei tih an sawi.

Kumin March 31 thleng khan MCAB hian ran vulhtute, sumchang thlai chíngtute leh huan siamtute (allied agriculture loan scheme) mi 3,255 hnenah loan an pe tawh.

Industry atana mi 1,298 hnenah loan an pe tawh a, sorkar hnathawkte hnenah Housing loan mi 1,807 hnenah an pe tawh. Sorkar hnathawkte tan Personal loan kum nga chhunga rulh zawh tur mi 1,865 hnenah an pe tawh a, sorkar hnathawkte tan kum nga chhunga rulh zawh tur chi tho, lirthei leina atan bik loan, lirthei man aṭanga 75% pek eng emaw zat an nei bawk.

Sumdawnna lirthei atan mi 55 hnenah loan an pe mek a; mimal eizawnna atana an hnathawhna tur bungraw lei nan mi 31 hnenah loan an pe mek bawk. Hetih lai hian, sumdawngte tan Cash Credit scheme hnuaiah mi 1,920-in loan hi an ba mek a, an bat tling khawm chu cheng nuai 7,465.75 a ni.