Police hotuin a insaknaah police-te a chhawr

1st. Battalion IR commandant HL Thangzuala'n Kolasib Ṭumpui Venga a mimal in sakna turah 1st. IR mi leh sa eng emaw zat a chhawra sawi a ni a; May 13, 2016 khan Kolasib-a thuthar lakhawmtute'n a hmunah enfiahin, IR mi leh sate chhawr an ni ngei tih an finfiah.

IR commandant HL Thangzuala'n a mimal in sakna turah IR police-te a chhawr nia sawi chu Kolasib-a thuthar thehdarhtute chuan bawhzuiin, May 13 khan a hmun, Ṭumpui Venga Nazareth Hospital hnunga mi chu an enfiah a; an enfiah lai hian 1st. IR police parukin lung lâk hna an lo thawk mek a ni.

Hna thawk mekte'n media-te zawhna an chhan danin, 1st. IR police panga/paruk vel an thawk ṭhin a, chawlhkar hnih vel an thawk tawh. Hna thawkte vil turin Commandant-in constable pakhat a dah a, ani chuan hmanraw mamawh angte a lakhawm ṭhin a; tlaia an hawna turin Police motor (Gypsy) pakhat chhawp a ni.

Kolasib Ṭumpuia hna an thawhna hmun hi Kolasib Police Station bula awm a ni a, 1st. IR mi leh sate chu Kolasib PS-ah hmun siamsak an ni. Hna thawhna bul hnaia awmte chuan, 1st. IR mite chu in sa pawl leh duty pawl an awm niin thuthar thehdarhtute an hrilh.

1st. IR Commandant hian Kolasib Ṭumpuia a mimal ramah hian in sak tumin, a sakna tur hmun laih hna leh lungrem hna thawk mek a ni a; in hmun laihnaah lung lian tak a awm avangin police-te chuan tunah chuan lung lak hna an thawk mek tih, Kolasib media-te chuan an sawi.

Hetih lai hian, Kolasib-a thuthar thehdarhtute chuan, Bairabi piah, Saikhawthlir rama IR police-te chu an pute lo enkawlin ramah an riak ṭhin tih thu an dawn thu leh, Hortoki lamah pawh IR police thingzaia chhawr an awm nia thu an dawn thu an sawi a; chu'ngte chu a ṭul anga la enfiah an tum thu leh Saikhawthlira riakte phei chu mobile phone pawh ken an phalsak lo nia an hriat thu an sawi bawk.