Naupang khuaikhem do nan kawngzawh

Mizoram State Legal Services Authority (MSLSA) leh Center For Peace and Development (CPD) ṭangkawp chuan, Inrinni zing khan nau-pang khuaikhem dona leh khuaikhem tâwkte thlavang hauh nan Aizawl-ah rally an buatsaih a; Vanapa Hall kawt aṭanga Millennium Centre kawt thleng kawng an zawh.

Millennium Centre kawta inkhawmah CPD president T Lalnunsiama chuan, mi ṭhenkhat, rin-tlak leh rinawm tak anga insawi a, mi thlêma an duh loh lama hruai kâwi ṭhin an awm tih sawiin, "Chu'ng ho lak-ah chuan fimkhur a pawimawh hle a ni," a ti a; naupangte chu fimkhur tura a fuih rualin, harsatna tâwk leh hrehawm tuar mek naupangte ṭanpuitu nih tum ṭheuh turin mi tinte a chah.

Kawngzawhah hian naupang eng emaw zat an tel a; naupangte chunga hleihlenna a thlen loh nana theihtawp chhuah tur te, hliam tuar naupangte ṭanpui tur te, naupangte'n an chanvo dik tak an chan theih nana theihtawp chhuah tur te, ṭanpui ngai naupang an hriat apiangte a ṭanpui theitu hnena hriattir ṭhin tur leh, harsatna tâwk naupangte auchhuahpuitu ni tur tein an intiam a ni.