Champhai district-ah thubuai ziahluh a pung

Tun hnai khan Champhai SP office-ah Champhai district chhunga thubuai thlen dan thlir let a ni a, nikum aiin kuminah thubuai ziahluh a pun thu tarlan a ni.

Meeting-a tarlan a nih danin, Kum 2015 khan January-April chhungin thubuai 66 ziah luh a ni a, kum 2016 January-April ah chuan thubuai 93 ziahluh a ni thung. Case ziahluh tam zawk chhan nia lang chu chhungkaw buaina non-FIR a ziahluh ṭhin regular case-ah ziahluh anih tawh vang leh thil tenau deuha langah pawh thubuai ziahluh zel a nih ṭhin tawh vang a ni.

Rukruk chungchangah mi tam takin mi thil ruk sa tih hriat chian ngawih ngawih lo leisak an awm ṭhin avangin rukruk a pun nasat thu meeting-ah hian tarlan a ni a, thil ruksa lo leisak hi dan bawhchhiatna anih avangin IPC Section 411 hmanga hrem theih an nih thu sawilan a ni.

Champhai police-te chuan district chhunga mipuite hlim tak leh thlamuang taka an awm theihna atan dan leh thu-pek ngaipawimawh ṭheuh turin mipuite an ngen a, "Khawtlang nun tichhe thei leh tibawrhbang thei zawnga che misualte man thuai an nih theihna atan khua leh tui kan nih ang leh danin min phut anga kan thil hriatte police hnena thlen zel turin kan in ngen a ni," an ti.