SYS Minister-in Darlawn Sport Centre a tlawh

Sports & Youth Services minister Zodintluanga chuan, Inrinni zing khan Darlawn Sport Centre tur siam mek a hmunah a tlawh a; Darlawn khawtlang hruaitute'n ṭawiawmin, hna thawh dante an enfiah bakah, hmalak zel dan tur an sawiho.

Zodintluanga chuan, Multi Sport Centre for Northern Region, Darlawna siam mek chu financial year kal mek chhung ngeia zawh tum turin thawktute a hrilh a; an hna thawh tawh chin ṭha thawkhata a ngaih thu a sawi.

Zodintluanga chuan, Multi Sport Centre chu tun dinhmunah Mizoram hmar lam tlangdunga infiamna hmun changtlung ber a nih tur thu a sawi a; December 14, 2014-ah work order pein, hna ṭan a ni a, sanction amount chu cheng nuai 359.17 niin, Mizoram State Sport Council hmalaknaa North Eastern Council sum pek hmanga siam a nih thu a sawi bawk.

Darlawn Sport Centre-ah hian football khelmual, volleyball court, basketball court leh mi 300 leng gallery sak a ni dawn a; Sports Minister chuan, gallery, volleyball court leh basketball court-te chu kumin fûr chhunga sa zo hman tura a tih bakah, fûra lei a tlak muk hnuah khelmual tihzâwl (levelling) khawih turin hna thawktu Lushai Engi-neers-te a hrilh a ni.

UDPA minister ni bawk Zodintluanga chuan Inrinni zing vêk khan, Darlawn Vegetables Market sak mek a tlawh bawk a; Darlawn Tourist Lodge-ah Darlawn Joint V/C-te nen khawtlang hmasawnna turte an sawiho bakah, Chalfilh group YMA-te nen an inkawm bawk.