MADC-a thawkte'n nawrh an titawp

Mara Autonomous District Council (MADC) sorkar hnuaia thawkte chuan, May 12, 2016 aṭanga tiam chin awm loa an nawrh chu May 14, Inrinni khan an titawp a; vawiinah pisa an kái leh ṭan ang.

Thawktu inzawmkhawm, Federation of MADC Employees Joint Action Committee-te hi 6th. Pay arrear an la lak loh 48% aṭanga a zatve, 24% tal pe tura sorkar kar nan an nuar a, May 12-13 khan pisa an kai lo. An thil phût hi MADC sorkarin tihhlawhtlin dan zawn a tum avangin nawrh an titawp nia thu dawn a ni.

Hnathawkte thil phût ngaihtuah hian MADC chief executive member RT Zachono, executive member te, Saiha District Congress Committee president S Hiato leh mi pawimawh dangte chu Inrinni khan Saihaah an ṭhukhawm a; MADC-a thawkte thil phût chu ngaihtuah zui an remti a, an thutlukna chu ziakin hna thawktu pawl hruaitute an pe nghal.

MADC sorkar thutlukna bawh-zui hian vawiinah hnathawktu inzawm-khawm hruaitute leh MADC hruaitute chu an ṭhukhawm dawn nia thu dawn a ni.

MADC-a thawk zinga mi 1,800 vel chu 6th. Pay Commission report anga sorkar hnathawkte hlawh tihsan a nih hnuah, 6th. Pay arrear la kim lo zingah an tel a, tun thlenga an hmuh kim loh chu 48% a ni.