Krismas vuakvêtah kum dang aiin New Market-ah pawisa bo report a tlem

Commerce & Industries department hnuaia Commerce Wing-in nikum Krismas dawn hnai leh vuakvet lai, December 1-31, 2019 chhungin Aizawl New Market leh a chhehvelah pawisa bo report an dawn zat belhkhawm chu Rs. 1,72,300 a ni. New Market Office hotute chuan, kum 2019 hunpui laia thil bo report an dawn chu kum 2018 hun lai aiin a tlem zawk thu an sawi.

Aizawl New Market Office thuneitute chuan, New Market leh a chhehvelah hian pawisa bakah thil dang bo report eng emaw zat an dawng a; pawisa ni lo, thil dang bo report an dawnte chu - mobile phone pathum, ATM card 12, Aadhaar card pahnih, driving license pakhat, e-roll card pakhat, voter ID pali, pheikhawk pathum, passbook pahnih leh naupang kamis pakhatte a ni.

December 1-20, 2019 chhung bika New Market office-ah pawisa bo report zat chu Rs. 13,031 a ni a, December 21-31 chhung bikah pawisa bo Rs. 1,59,269 ziah luh a ni. Pawisa bo report zinga Rs. 5,700 chu hmuh lêt niin, a neitu hnenah pek a ni a; a tam zawk chu hmuh let a ni lo.