NLUP-ah hlawhtlinna a awm: PC Lalthanliana

Minister PC Lalthanliana chuan, Inrinni khan Lunglei North cluster chhunga NLUP hnuaia vawk vulh thlangtu mi 209 hnenah ṭanpuina Rs. 28,000 ṭheuh a sem a; thu sawiin, a tak taka hna thawktu tan NLUP-ah hlawhtlinna a awm tih a chian thu a sawi.

NLUP ṭanpuina sem inkhawm hi Lunglei Farm Veng community hall-ah neih a ni a; PC Lalthanliana chuan, "India ramah state lian leh hausa zawkah kut hnathawktute mangang a, a ṭhen an intihhlum laia Mizoramah eizawnna bul inṭansak nana a sing tela ṭanpuina sem hi a nêp lo hle," a ti a; sum harsat lai pawha kut hnathawktute tana sum a awm reng chu sorkarin kut hnathawktute a ngaihsak vang niin a sawi.

Minister chuan, thawk tak takte tan chuan NLUP-ah hlawhtlinna a awm tih a chiang nia sawiin, "Kut hnathawktute'n eizawnna ṭha leh rintlak an neih hi MLA kan nih chhan a ni," a ti. NLUP bawhzui zel nan NEDP ruahman mek a ni tih sawiin, "NEDP chhawr zui thei tur chu NLUP hmang ṭhatute an ni a, NLUP hi in vawiin atan ni lovin in naktuk atan a ni a, in hman ṭhat chuan nakina in lawmna a la nasa zawk em em dawn a ni," a ti.

PC Lalthanliana chuan, NLUP hnuaia bawng vulhtute an hlawhtling hle nia sawiin, "Aizawlah phei chuan hralh sên loh an nei tawh a, anganwadi centre zawng zawngah bawnghnute sem a ni tawh a, cheng nuai 30 man Social Welfare department-in a leisak tawh a ni," a ti.

Sorkarin vawk notê a sem tawh zat ngaihtuah chuan, Mizoram chu state páwna vawk thawn chhuak thei âwm a nih tawh thu sawiin, "Vawk hri PRRS hi khawchhak aṭanga vawk lak luh vanga lêng a nih chuan, a vênna ṭha ber chu vawka intodelh a ni," a ti bawk.