NEDP kalpui turin sorkar a inbuatsaih Dept-te'n project an neih that a ngai

Mizoram sorkar, Congress party kaihhruaiin policy a siam thar, New Economics Development Policy (NEDP) kalpui turin Mizoram sorkar a inbuatsaih mek a, NEDP atan hian sorkar department-te'n project an siam ṭhat a pawimawh hle dawna thu dawn a ni.

State Planning Boad vice chair^-man H Liansailova chuan Vanglaini palai zawhna chhangin, "NEDP kalpui dan turin sorkar lamin an duang mek a, detailed working plan peih a la ni lo. NEDP hi a hma thei ang bera kalpui tum a ni a, chumi atan chuan sorkarin theihtawp a chhuah. He policy kalpui tur hian hun bituk hrang hrang siam a ni a, ṭhenkhat tihhlawhtlin hman a nih laiin, tihhlawhtlin hman lote pawh a awm," a ti.

Planning Board Vice Chairman sawi danin, NEDP hnuaiah thlai chi hrang hmun hrang hranga chìn ṭhin chu tihtawp a ni dawn a, thlai thlan bik neiin a chìnna tur bik hmun ruahman a ni ang.

State páwn aṭanga thlai thar lei duhte'n an duh tam ṭhin avangin market lamah harsatna a awm lohna atana tih a ni a, a sawngbawlna lam pawh uar tum a ni.

NEDP hmangin Mizoram chu market hmunpuiah siam tum a ni tih sawiin Liansailova chuan, "Market tih hian state páwna thil thawn chhuah ringawt kan ngaihtuah ṭhin. Mizoram hi market hmunpuiah siamin, state pâwn aṭangin kan thil siam chhuah leh thar chhuahte an rawn lei zawk ang. Chumi atan chuan theihtawp kan chhuah dawn," a ti.

H Liansailova chuan, NEDP chu a kalpui tur bik department an awm lo tih sawiin, "Policy milin department-te'n project an siam ang a, chu chu sorkar thuneitute'n an enfiah ang a, kalpui tlaka an ngaih chuan an policy chu NEDP hnuaiah kalpui a ni ang," a ti a; NEDP hlawhtlinna atan department-te'n project an neih ṭhat a pawimawh tur thu a sawi.

Planning Board Vice Chair-man sawi danin, sorkar department-in policy an siam turah hian NEDP thil tum, miin eizawnna ngêlnghet leh rintlak an neih theihna tur leh, ram tana ṭangkai leh ṭha tur ngaih pawimawh a ṭul an ti a; NEDP ṭanpuina dawngtute chu a kaihhnawih department-in a ṭul angin an buaipui ang. Department ṭhenkhat chuan sorkarah project an thehlut tawh a ni.

Zawhna chhangin H Lian-sailova chuan, mimal pawhin project thehluh theih a nih thu a sawi a, "An project thehluh chu ram tana ṭha tur a nih a, NEDP thil tum nena a inrem phawt chuan NEDP hnuaiah kalpui theih a nih lohna chhan tur ka hre lo," a ti.

NEDP hi Planning Board-in an duang a, sorkar lama thuneitute'n an endik hnuah pawm a ni. Mizoram mipuite'n eizawnna ngêlnghet leh rintlak an neihna tura tih niin, kumin sorkar kum aṭanga kalpui ṭan tura tih a ni. Kum nga chhung kalpui tura ruahman phawt a ni a, kumin 2016-17 chhung bik atan cheng vbc. 250 dah a ni.