Thlâl kang theih loh tuikhur an nei lo: Zorama

MNF president Zoramthanga chuan, chief minister Lal Thanhawla'n 'Thlâl kang theih loh pawisa tuikhur a nei' nia a sawi chu inbumna niin a sawi a, "India ram state leh UT zawng zawngte'n kum tin budget an hmuh ṭhin pangngai bâk ‘Tui-khur dang’ an nei lo," a ti.

Nimina Mizo Hnam Rûna inkhawmah thu dawiin, Zoramthanga chuan, "MNF sorkar kha chuan state dangte thàl ve theih loh tuikhur, ‘Peace Bonus’ kan nei," a ti a; tuna sorkar mek, state dangte thâl kang ve theih loh pawisa tuikhur nei intite hnuaiah ram mipuite'n harsatna rapthlak tak an tuar mek niin a sawi.

Zoramthanga chuan, Congress kaihhruai sor-karin sum hâi chhuahna bik an neite chu - zu chhiah te, motor vehicle lifetime tax kum 15 atana lakte a nih thu a sawi. Chutih laiin, Congress sorkarah inkalpawhna kawngpui ṭha a awm lo a, state dang aṭanga kawlphetha leina bat a tam a, thisen unit khatah Rs. 550 lak a ni a, contractor leh supplier-te bill lak tur cheng vbc. 1,000 chuang sorkarin a ba mek niin a sawi a ni.

MNF President chuan, Mizote chu Pathianin a hung bik tih sawiin, "MNF din chhan, 'Pathian leh kan ram tan' tih hian Kristiante Pathian hi kan inngahna a ni," a ti a; kumin chhunga MNF-in mi thar duhawm tak tak an lawm lut reng chu Pathian malsawmna a nih thu a sawi.

MNF thuchhuah chuan, nimina Mizo Hnam Rûna inkhawmah hian Zoramthanga'n party dang aṭangin mi 52 MNF-ah a lawm lut niin a tarlang.