Finance Minister-in hydel project a tlawh Tuirial HEP-ah hna 75% zawh a ni tawh

Finance minister Lalsawta chuan, tun hnai khan Tuirial Hydro Electric Project (HEP) siam mek leh Serlui-B Hydel Project a tlawh a, an dinhmun a enfiah. NEEPCO hotute chuan, Tuirial HEP chu 75% an thawh zawh tawh thu an lo hrilh.

Tuitial HEP a tlawhnaah Finance Minister hi NEEPCO hotute'n lo dawngsawngin, an hna thawh dan te, an hmachhawp leh ruahmannate leh harsatna an neihte an lo hrilh. Lalsawta chuan, an harsatnate chu sutkian dan kawng zawnpui a tiam a, hna chu a hun takah zo hman tura theihtawp chhuah turin a chah.

NEEPCO engineer-te sawi danin, Tuirial HEP-ah hian hna 75% thawh zawh a ni tawh a, tui khuah (dam) leh power house-te siam mek a ni. Tuirial HEP-ah hian kawlphetha megawatt 30 ve ve siam chhuak thei tur khawl unit pahnih a awm dawn a; unit pakhat chu June 2017-a peih hman tum niin, unit pakhat dang chu September 2017-a peih hman beisei a ni.

Minister Lalsawta hian Serlui-B Hydel Project-ah a enkawltu engineer-te a kâwm a; project kalpui a nih theih dan tur leh harsatna awmte chinfel dan tur an sawiho.

Sorkar thuchhuah tarlan danin, Serlui-B SHP hi kum 2010 laihâwl aṭangin hman ṭan a ni a, kawlphetha megawatt 4 ṭheuh pe chhuak thei tur khawl unit pathum bun a ni. Unit pakhatna leh pahnihnate'n hna an thawk mek a, unit pathumna chu kum 2017 tawpah peih hman tum a ni.

Hetih lai hian, unit pahnihna khawl chu a chhiat rih avangin tunah chuan unit pakhatna
aṭangin megawatt 4 chiah siam chhuah theih a ni rih a; khawl chhia chu siam
ṭhat thuai tum a ni.