Pawl 12 pass aiin college-a Seat 5,444-in a tam

Mizorama college hrang hrangah kum 2015-16 session khan seat 14,191 a awm a; hetih lai hian, HSSLC Examination 2016-ah pawl 12 pass zirlai 8,747 an awm. Degree course-a seat awm zat 14,191 hi MBSE hnuaia kumina pawl 12 pass thar zat hi 5,444-in a tam zawk.

Higher & Technical Education (HTE) department hotute hnen aṭanga thu dawn danin, Mizorama college zawng zawnga seat awm zat 14,191 hi Arts, Science leh Commerce-a seat awm zat a ni a, professional course-a seat awm zat a tel lo.

Degree course-a general course - Arts, Science leh Commerce bakah hian, Mizoram chhungah professional course hrang hrang zirna a awm a; Women Polytechnic, Aizawlah paawl 12 pass chin zir theih course-ah seat 30 a awm a, nursing course (GNM leh B.Sc.) seat eng emaw zat a awm. Heng bakah hian, HTE department hotute chuan, Mizoram páwna college/institution zawm tur zirlai ṭhahnem tak an awm leh ngei a rinawm thu an sawi.

HTE department hotute chuan, kumin HSSLC pass thar zirlai 8,747-te'n Mizorama college hrang hrangah seat an inchan turah an ngai a; compartmental chance nei zirlai 214-te pass leh vek pawh ni se, admission an inchan turah an ngai. Chutih rualin, Aizawla college bikah erawh chuan seat an inchan loh theih thu an sawi bawk.