Truck driver-te kutthlâk an nih avangin Teirei kânin truck driver-te kal an tum lo

Mizoram Truck Drivers Association (MTDA) chuan, Mamit district-a Teirei lui bul, Saikhawthlir mi 50 velin truck driver leh handyman mi pasarih kut an thlâk avangin thu leh awm hma chuan Teirei lui kânin an tlan rih dawn loh thu an puang.

Truck driver leh handyman-te May 11, 2016-a kutthlak an nih chungchangah hian MTDA chuan nimin khan Aizawl SP-ah FIR an thehlut a; kutthlaktute chu zawng chhuak a, an phûtâwka hrem turin an ngen a ni.

MTDA hian nimin khan Aizawl Press Club-ah thuthar thehdarhtute an kâwm a; an president Lalramluaha chuan, Mamita buhfai dahtu truck pangate chuan Zawlnuamah balu an la nghal a, an haw leh lam chu Saikhawthlir mite'n kut an lo thlâk rawn a, nasa takin an khawih niin a sawi.

Lalramluaha sawi danin, truck driver-te hian an kal lamah Teirei leia truck-in balu an phurh theih zat an zawhnaah metre 5 tiin lei vengtuin a hrilh a; chumi ang chuan truck-te chuan balu metre 5 an phur a, metre 5 an phur ngei tih tichiang turin Environment & Forest department-in receipt an pek pawh an la kawl ṭha a ni. Lei enkawltu erawh chuan, E&F receipt chu an pawm lo niin a sawi thung.

Balu phur chunga Teirei lei an thlen lehin lei vengtu chuan phal chin aia tam leh rit an phur nia sawiin, leia kaltlang a phal lo a; leia balu inhlan chhàwnna tur motor dang an buaipui a, khua a tlai tawh avangin eirawng an bâwl nghal bawk. Lei enkawltute nen an inbiakna velah chuan inhnial buaina leh intihlungawi lohna an nei lo tih an sawi.

Lalramluaha chuan, lei enkawltu chuan Saikhawthlir mite a pun a, eirawng an bâwl mek laiin Saikhawthlir mi 50 vel an thleng a, inbiakna pawh awm loin kut an thlak rawn nghal mai niin a sawi a, "Ran ang maiin an sawisa a, chaw leh chawhmeh an siam tawhte pawh an tihbuaksak vek a ni," a ti.

Kut tuarte zinga mi, Zodina chuan, Saikhawthlir mite zingah khawtlang hruaitu nia insawite pawh an awm tih a sawi a, "Min khawih nasa a, min tiduhdah khawp mai," a ti a; zawhna chhangin, an zingah zu in leh rûi an awm loh thu leh, lei bula hriattirna intárah chuan lei chu metric ton 8 phur chin zawh theih a ni tih a chuan thu a sawi.

Kut tuartu dang, Lalngilneia chuan, leia duty-te nen inhnialna an neih loh thu leh lei chu zawh luih an tum loh thu a sawi a, "Leia duty nupui pawhin inhnialna kan neih loh thu Saikhawthlir mite chu a lo hrilh a ni," a ti.

MTDA adviser Lalzawmmawia chuan, Saikhawthlir mite chuan media-te hnenah dâwt an sawi a, driver-te'n an khawih hmasa angin an hrilh niin a sawi a, "Teirei lei velah truck driver-te tan kal a hima kan hriat hma chuan Teirei lei kânin truck driver-te kan kal tawh rih lo ang," a ti.

MTDA President pawhin, Mamit pêla Teirei lui kân lo turin Mizorama truck driver zawng zawngte a chah nghal.