Mizoramah mi 76-in Dengue an vei tawh

Nimin khan Mizoram hmun hrang hrangah a vawi khat nan National Dengue Day hman a ni. He hunah hian, Mizoramah kum 2012 aṭanga kumin March thla thlengin dengue vei rinhlelh mi 815 endik tawhah mi 76-in an vei tih hmuhchhuah a ni a, thihpui erawh an la awm lo tih tarlan a ni.

National Dengue Day hi Aizawlah chuan Aizawl West Chief Medical Officer (CMO) hoin Health Worker School training hall-ah hman a ni. State Vector Bourne Disease Control Programme (SVBDCP) consultant Dr Zorammuana'n National Dengue Day a sawifiah a, Dr Vanlalnghaki'n Dengue natna awmzia leh enkawl dan a sawi.

National Dengue Day hmannaa an tarlan danin, kumin January-March chhung khan Mizoramah Dengue vei nia rinhleh mi 48-te thisen endik a ni a, chu'ng zinga mi pakhat chuan Dengue a vei tih hmuhchhuah a ni.