MPC-in CM thusawi lungchhiatthlak an ti

MPC party office bearer-te nimina an party pisaa an president Lal-hmangaihsa Sailo hoa ṭhukhawm chuan thu-chhuah siamin, chief minister Lal Thanhawla'n Mizoramah naupangte sikul kai rual kal tawh lo an pun zel thu leh, nau-pangte dikna leh chanvo humhalhna kawngah hmalakna ṭha a awm tawk loh thu a sawi chu lungchhiatthlak an tih thu an tarlang.

MPC chuan, May 13, 2016-a Mizoram State Legal Services Authority (SLSA)-in naupangte dikna leh chanvo hum-halh-na kawnga inzirtirna tur documentary film a tlangzarhnaa Chief Minister-in, naupangte hma-khua ngaia nasa zawka ṭan la tura kohhran-te a ngen chu naupangte enkawlna kawnga Congress sorkar hlawhchhamna leh mualphona leh, mi kuta rûl kaw zen tumnaa an ngaih thu an sawi.

CM-in tu'ma thàl kang ve theih loh tuikhur an neih thu a sawi chu lawmawm an tih thu sawiin, MPC chuan, "Chuti taka tuikhur hlu an lo nei reng a nih chuan Mizorama ṭhalai hna nei lote hna siamsak tur te, kawng chhiate siamṭha tur te, Mizorama lui liante khuap tur te, kut hnathawktute tana thawh manhla turin sawhthing leh sum chang thlai reng reng man man taka siamsak turin kan beisei a ni," an ti.