Kan ramah kan ei sen loh a thar theih Chu chu kan target pui ber a ni - CM
Food, Civil Supplies & Consumer Affairs (FCSCA) department-in kudam an sak thar pakua chu nimin khan Assembly Annexe conference hall-ah chief minister Zoramthanga'n a hawng. Chief Minister chuan, Mizoramah a chhunga cheng mipui ei sèn loh a thar theih thu sawiin, "Chu chu kan target no. 1 a ni," a ti.
CM Zoramthanga chuan, Mizote chu Pathianin ram leh sik leh sa ṭha tak a pek thu sawiin, "Kan ramah mihring maktaduai âwrh chauh kan cheng a ni. Kan ram neih hi sq.km. 30,000 aia zau a nih ka ring, leileta siam theih ringawt pawh hectare 70,000 aia tam a awm. Min châwm zo tur leileta siam tham kan nei," a ti a, leileta siam theih hmun thuma ṭhena hmun khat pawh siam a la nih loh thu a sawi.
Leilet siam chu sorkarin target puiah an neih thu sawiin Zoramthanga chuan, "Khawl vekin leilet kan siam tawh ang, bawng leh láwi nena ti tawh loin. Silchar leh Dholai buai leh rél kawng a chhiat pawha harsatna awm loh nan hmalak kan tum. Covid-19 hian min tibuai lo se nasa taka beih tur a ni," a ti.
CM Zorama chuan chaw atana mamawh - buh, wheat, thlai leh saah intodelh phawt a pawimawh thu sawiin, "Chaw atana mamawha kan intodelh phawt chuan kan huai a ni mai. Siamtu'n intodelhna turin kan ram a duang a, a tihhlawhtlin hi kan mawhphurhna a ni," a ti a, chaw atana mamawha intodelh chu an hmathlir pui ber a nih thu a sawi.
Japan leh Israel mipui maktaduai khat Mizoramah chempui nen ringawt awm se, kum 10 hnuah India ram state zinga per capita income sang ber an nih a rin thu sawiin CM chuan, "Chu chu kan âwih em, kan awih ang, kei pawhin ka awih. Ngati nge chutiang tur chuan kan tih loh bik. Kan ngaihtuahna kan thlak thleng a ngai," a ti.
Chief Minister chuan, mipuiin buhfaiah harsatna an tawh loh nan department-in theihtawp an chhuah ṭhin tih sawiin, "An hmalakna zarah harsatna hrang hrang karah nghei loin kan awm thei a ni. Buhfaite ṭha taka dah theihna turin kudam ṭha a ngai. Fûrah buhfai nasa takin a chhe ṭhin a ni," a ti a, kudam sakna tur an ngaihtuah zel tur thu a sawi.
Khualzahawm, FCSCA minister K Lalrinliana chuan, sorkarna an chan hlimah kudam sak ṭhat ngai tak tak 60 chuang a awm thu sawiin, "Tuna kan sak bakah hian NABARD hnuaiah 10 sa leh turin contractor kan thlang tawh. A dang 37 sa leh turin kan inbuatsaih mek a, kan beisei anga 37 kan sa leh thei a nih chuan kan zia viau tawh ang," a ti.
Mizoram sorkar chuan kudam 10 sakna atan sorkar laipui aṭangin sum hmuh tura ruahman sa piah lamah cheng vbc. 19.22 a dawng a, chumi hmang chuan hmun pakua - Chawngte, Kolasib, Khawlailung, Khuangléng, Darlawn, Reiek, North Hlimen, Darlung leh Maubawkah sak zawh a ni tawh. Lawngtlaiah erawh chuan a hmun turah harsatna a awm avangin hna ṭan tlai a ni a, sak mek a ni.
Kudam bakah hian, thawktute chenna tur quarters leh inthiarna sak tel vek a ni a; sum ruahman vbc. 19.22 aṭanga hman bân hmangin Kolasib-ah DCSO pisa sak a ni.