Covid-19: Mizoram dinhmun Mizorama kái hmuh belh lo
October 8, Ningani khan Mizoramah Covid-19 hripui vei mi pasarih hmuh chhuah a ni a, tun hnaia state pawn aṭanga rawn lut vek niin, Mizoram chhunga kái chhâwng an awm lo. Nimin khan hripui vei tawh lo mi 37 chhuahtir an ni thung.
Ningania hripui vei hmuh chhuahte chu mipa panga leh hmeichhia pahnih an ni a; ZMC laboratory-a hmuh chhuah mi pahnih, Mamit District Hospital TrueNAT laboratory-a hmuh mi pakhat leh, Rapid Antigen Test (RAT) hmanga Aizawl leh Mamita hmuh chhuah mi pali an ni. An zingah Covid-19 symptom nei an awm lo.
Nimin khan mi 37 chhuahtir an ni a; SRH-ZMC aṭangin mi pakhat chhuahtir a nih bakah CCC hrang hrang - Tribal Art Centre aṭangin mi 14, Serchhip Nursing School aṭangin 10, Gilead Special School aṭangin paruk, Lunglei Pukpui aṭangin pahnih, Zokhawsang, Champhai, Kolasib SIRD leh Thingdawl aṭangin mi pakhat ṭheuh an chhuak a ni.
Mizorama Covid-19 positive hmuh chhuah tawh chu mi 2,157 an ni a, mipa 1,783 leh hmeichhia 374 an ni. An zinga mi 1,974 (91.52%) chu an fihlim tawh avangin an chhuak tawh a, enkawl mek mi 183 (8.48%) an la awm. Enkawl mek zingah Covid-19 negative tawh an awm nual bawk nia thu dawn a ni.
October 8-a ZMC laboratory-a hmuh chhuah chu mipa pahnih an ni a; Bihar lam mi kum 50-a upa, Hotel Orchid-a khung hran mek leh, Karimganj mi kum 22-a upa, Zemabawk Cancer Hospital-a thawk an ni. Mamita TrueNAT-PCR hmanga hmuh chhuah chu mipa kum 40, Mangaldai, Assam aṭanga lo haw, quarantine facility-a awm mek a ni.
RAT hmanga Aizawla hmuh chhuah chu West Bengal mi kum 55-a upa a ni a, Lengpui Airport-ah RAT hmanga endiknaah hripui a vei tih hmuh a ni. Mamit district-a hmuhte chu mipa pakhat leh hmeichhia pahnih, kum 32-60 inkar an ni a; Darchawi, Tripura aṭanga rawn haw niin, Tripura ramri dep Kanhmun screening point-ah RAT hmanga endikna aṭanga hmuh chhuah an ni.
October 8 khan Mizoramah mi 285-te swab sample endik a ni a; ZMC-a endik mi 130, TrueNAT-PCR hmangin district pasariha endik mi 55 leh, RAT hmanga district paruka endik mi 100 an ni.