Ram pass lem hmanga zangnadawmna dawngtute Special Court-in thiam loh a chantir

Kum 2007 bawr vela India leh Bangladesh ramri hung tura mimal ram lâkah ram pass (LSC) lem hmanga zangnadawmna dawngtu mi 23-te chu Aizawl District Court-a Special Court (Prevention of Corruption Act) chuan nimin khan thiam loh a chantir a; May 20, 2024-ah hremna tur tihchhuah a ni ang.

Ram pass lem siama zangnadawmna inpek leh lak thubuaia hming langte hi man deuh vek an ni a, mahse, bail-in an chhuak hlawm. Thiam loh an chan tâk avangin bail-a an chhuah mekna chu Court chuan a ṭhiat nghal a; man a, jail-ah dah luh nghal tura tih an ni. Patul Chakma leh Tamanna Chakma te erawh chu Warrant of Arrest a awm chungin man an ni lo hrim hrim thung.

Thubuai ngaihtuah laiin CBI-in thuhretu mi 34-te court-ah thu an zawtfiah. Special Court (PC Act) judge Dr HTC Lalrinchhana chuan, CBI chu an thubuai khawih chu an finfiah ṭha tawkah ngaiin, IPC Section 420/468/471 leh PC Act Section 13 (2), 13(1)(c),(d) tlawhchhanin thubuai siamsakte chu thiam loh a chantir vek a ni.

Court thuremnaa a lan danin, kum 2007 velah India leh Bangladesh ramri hungnaa sorkarin mimal ram a lakah ram pass (LCS) lem 35 hmangin zangnadawmna dawng an awma hriat a ni a, CBI-in an chhui a ni.

Ram lak hun laia Chakma Autonomous District Council (CADC)-a Revenue officer (Settlement) Ranga Mohan Chakma chu pam pass lem pe chhuaktu bera puh a ni a; CADC surveyor pahnih - Borcheg Image Chakma leh Manabendra Chakma te nen inthurualin, ram lak ngai tur hming (list) dik lo taka inthurual a siama puh an ni.

Thubuaia lang ram pass-te chu sorkar pisa chawlh nia pek chhuah deuh vek a ni a; ram pass-ah CADC (Agricultural Land) Act, 1983 leh CADC (Agricultural Land) Act, 1993 hnuaia pass pek chhuah anga tarlan a nih laiin, dan tlawhchhan hi CADC-in a nei lo a, CADC (Agricultural Land) Act, 1982 a nei thung.

A hun laia CADC chief executive member Kali Kumar Tongchangya leh executive member dang Dr Buddha Dhan Chakma, Tarani Sen Chakma, Buddha Lila Chakma leh Mohan Chakma ten July 21, 2009-a thutlukna an siam angin July 23, 2009 khan ram pass lemte tihchhiat vekna tur thupek siam a ni a, ram pass lem awmna file chu CADC chuan an tichhia/tiriral vek a ni.

CADC sorkar thil tih dan chu Court chuan ram pass-te a lem a nihzia a tichiangah a ngai a; mahse, ram pass tihchhiatna tura thutlukna siamtu CADC sorkar hotute lakah CBI-in thubuai an siam lo.