MC sak zawm dan tur sawiho a ni

Chief minister Lalduhoma leh Millennium Centre Authority (MCA) hotute chuan nimin khan CM pisaah Millennium Centre enkawl dan leh sak chhunzawm chungchang an ngaihtuah.

CM Lalduhoma chuan, Millennium Centre-a vantlang inthiarna chu pawisa chawi ngai loa kalpui theih a nih leh nih loh te, dawr neitute leh a luah chhâwngtute inkarah luah man mumal zawk leh inremna dan ṭha zawk duan theih a nih leh nih lohte MCA Governing Body-in ngaihtuah se ṭha a tih thu a sawi.

MCA manager R Lalnunpuia chuan Millenium Centre sak dan kimchang leh tuna an dinhmun a sawi a; Chief Secretary kaihhruai Millennium Centre Governing Body-in North Block building chung lama sak belh tura ruahmanna a duan tawhte a sawifiah.

Tarlan danin, Millennium Centre hi Structural Safety Certificate nei, original design anga chhawng li la sak belh theiha him a ni a; tunah chuan food court tur bik chhâwng khat chauh sak belh dan ngaihtuah phawt ni se, tiin Governing Body chuan an ruahman a, an ruahmanna chu Chief Minister hnenah an thlen a ni.

Millennium Centre sakna sum chu a tìr aṭangin loan hman niin, sorkar sum ruahman a ni lo a, loan chu an rûl zo tawh. Sak zawm leh an tumah pawh sorkar sum hmang loa kal an tum.

Millennium Centre-ah hian dawr 342 a awm mek a, chu'ng zinga pali chu hunbi neia luahtir (rent out) niin, a dang zawng chu a leitute hnenah kum 91 chhung atan pek a ni. Thawktu nghet mi pariat an awm a, high definition CCTV 66 vuah a ni.

Chief Minister hoa sawihonaah hian MCA aṭangin PWD engineer-in-chief Lalrinkima, chief engineer (Roads) Lalzarliana leh manager R Lalnunpuia te an tel.