Bawlhhlawh thliar ṭha ber - College Veng

Aizawl Municipal Corporation (AMC) chuan nimin khan Vanapa Hall-ah bawlhhlawh thliar hrang ṭha (Best Performing Local Councils in Segregation of Waste-2020) vengte hnena lawmman hlanna hun an buatsaih a, UDPA enkawltu deputy chief minister Tawnluia'n a hmanpui. Bawlhhlawh thliar hrang ṭha ber chu College Veng a ni.

Tawnluia chuan, tun hma chuan Aizawl khawpui tihfai leh bawlhhlawh thenfai hna chu LAD mawhphurhna a nih ṭhin thu sawiin, "Khawpui ṭhang zelah AMC kan lo neih takah khan khawpui tihthianghlim leh bawlhhlawh paih leh sâwngbàwl chu AMC kutah, UDPA department-te nen ṭanghoin a tla ta a ni," a ti.

Aizawl khawpui ṭhang zelah bawlh­hlawh a tam ve zel a, Solid Waste Management Act, 2016 tlawhchhanin bawlhhlawh thliar hran a ngai ta tih sawiin Deputy CM chuan, "Khawpuiah mihring kan changkang zel a, bawlhhlawh mumal taka thliar hran in tinah a lo ngai ta a ni," a ti a; bawlhhlawh thliar hran kawngah chhungkaw tinte ṭan la thar turin a chah.

Lawmman sem inkhawmah hian Aizawl North-III bialtu MLA C Lalmuan­puia, AMC mayor PC Lalhming­thanga leh deputy mayor Lalringliana te pawh an tel.

Best Performing Local Councils in Segregation of Waste - 2020 lawmman dawngtute chu - pakhatna College Veng LC, pahnihna - Chawnpui LC leh pathumna - Upper Republic LC an ni. Pakhatnain Rs. 50,000, pahnihnain Rs. 30,000 leh pathumnain Rs. 20,000 bakah thuchei an dawng a ni.