Lunglei police-in mobile phone bo/rûkbo a neitute an pe lêt

Lunglei police-a Cyber Cell chuan nimin khan mobile phone bo leh rûkbo report an dawna an hmuh lêtte a neitute hnenah an pe lêt.

Mobile phone bo inpek letna inkhawm­ah Lunglei SP J Lalmuankima chuan, Cyber Cell thawhrimna avangin mobile phone eng emaw zah hmuh let a ni tih a sawi a, "Mobile phone bo hi Lunglei mai ni lo, Mizoram leh India ram hmun dangah a tam em em a, a tibo­tute tan uiawm tak a ni. Lunglei police chuan tê lua awm loin, mobile phone tihbo report awm tawh phawt chu chhui chhuahsak zel kan tum," a ti.

Lunglei SP chuan, information technology lama changkanna ûm phâk zel a ṭul thu sawiin, "Tuna kan hlawhtlinna pawh hi Central Equipment Identity Register (CEIR) portal awmze nei taka hman ṭangkai vang a ni," a ti a; sualna pung zel milin police-te'n hmasawnna an neih ve zel a ṭul thu a sawi.

Nimina mobile phone bo leh rûkbo police-in an hmuh chhuah an pek lêtte chu mi 11 an ni a, Apri 23, 2024 aṭanga May 16, 2024 chhunga hmuh chhuahte a ni. March 14, 2024 aṭanga April 23, 2024 chhunga an hmuh chhuahte chu a hmain a neitute hnenah an lo pe let tawh bawk.