LADC CEM-in fiahna a paltlang

Lai Autonomous District Council (LADC) chief executive member (CEM) atana ruat C Lalmuanthanga'n CEM ni tura thláwptu a ngah leh ngah loh nimin khan session neia fiah a ni a, sorkar siam turin thláwptu a nei tling a, fiahna a paltlang.

Tarlan tawh angin, LADC-ah hian Congress member pakhat leh MNF member 12-te'n United Legislature Party (ULP) dinin, sorkarna an siam a; Congress MDC awm chhun C Lalmuanthanga chu leader/CEM atan an thlang.

C Lalmuanthanga'n sorkar siam tura thláwptu a ngah leh ngah loh fiahnaah elected MDC 18 zinga 12-in an thláwp a, mi parukin an thláwp lo. Fiahnaah hian LADC chairman VL Hmuaka chuan bán pharin vote a la a ni.

C Lalmuanthanga chuan, LADC-ah mipui ban phak sorkar din a ṭul thu sawiin, "Party pahnihin an siam sorkar ni mah se, party bil leh thunei bik awm chuang lo, hmasawnna atana ṭha turah chuan mimal thuneihna kalsan a, a tam zawkin ṭha an tih lamah sorkar a kal dawn," a ti a, member-te rorelnaah finchhuah ṭhin turin a sáwm.