KHAWTHLIR
Thisen pe
Lairam Isua Krista Baptist Kohhran Ṭhalai Pawl, Vawmbûk Bial, South Lungpher Bial leh Bualpui Ng Bialte chuan nimin khan Vawmbûkah thisen pek rûnpui an huaihawt a, Lawngtlai District Hospital tan thisen unit 52 an pe a, petute mipa 49 leh hmeichhia pathum an ni. Khawhai HSS NSS pawhin nimin khan Champhai District Hospital blood bank-ah thisen unit sarih an pe bawk.
Crusade sawipui
Go Harvest Ministry, USA aiawhte chuan nimin khan chief minister Lalduhoma a pisaah an kâwm a, kumin November thlaa Aizawla crusade buatsaih an tum sawipuiin, a ṭul anga pui turin an ngen. CM chuan, a theih ang anga ṭanpui a inhuam thu a hrilh.
District thlâk
Mizoram sorkar chuan Zote South leh Kanghmun South khuate chu Cooperation department enkawl danah Lunglei district aṭangin Serchhip district-ah a sawn a, Governor-in hriattirna a tichhuak. Hriattirna hi a taka hman nghal tur a ni.
Bekang um inzirtir
Mizoram Science, Technology & Innovation Council (MISTIC) leh BRIC-Institute of Bioresources and Sustainable Development chuan May 16-17, 2024 khan thianghlim zawka bekang um dan leh bio-resource hausakna hmanga ram hmasawnna thlen theih dan tur zirhona an buatsaih. Mizoram University vice chancellor Prof. Dibakar Chandra Deka khuallian a ni a; bekang umtu te, research scholar leh zirlai bakah, sorkar department aiawhte an tel.
Annual Credit Plan tlangzarh
Hnahthial District Consultative Committee, District Level Review Committee leh District Level Security Committee chu an chairman Chuauhnuna, bawrhsap hoin nimin khan DC conference hall-ah an ṭhukhawm a, Hnahthial district Annual Credit Plan 2024-25 tlangzarh a ni. Hnahthial district-a bank hrang hranga saving account leh current account-te chu March 2025 hmaa digitalise vek tawh tur a ni a, tun dinhmunah 48% digitalised tawh a ni.
Kawlphetha pe thei dawn lo
Sihhmuia 132KV Sub-Station-ah vawiin zing dar 9 aṭanga tlai dar 3 thleng hna thawh a ni dawn a, hna thawh chhungin 132KV Sub-Station, Sihhmuiin a châwmte'n kawlphetha an hmu dawn lo. Kawlphetha pek loh turte chu - Sairang leh a chhehvel leh a thlang (khawthlang) lam khaw hrang hrang, Bangladesh ramri thlengin a ni.