HSLC-ah exam zat aṭanga chhûtin hmeichhia aiin mipa pass an tam

HSLC Examination 2024-ah zirlai mipa leh hmeichhia exam zat aṭanga chhûtin hmeichhia aiin mipa pass an tam a, hetihlai hian division sangah mipa aiin hmeichhia an tam zawk.

Kumin HSLC exam-ah hian zirlai mipa 8,873 zinga 8,654 leh hmeichhia 10,122 zinga 9,907-in exam an hmachhawn a; exam zawng zawng mi 18,561 zinga 53.38% chu hmeichhia niin, mipa exam hi 46.62% an ni.

MBSE-in HSLC 2024 result bu a tihchhuaha a lan danin, kumin HSLC exam-ah hian zirlai mipa exam 8,654 zinga 6,437 (74.38%) an pass a, zirlai hmeichhia 9,907 zinga 7,181 (72.48%) an pass bawk. Mipa pass percentage aia hmeichhe pass percentage hniamna hi 1.9% a ni. Kum 2023 khan mipa pass percentage (71.99%) chu hmeichhe pass percentage (70.4%) aiin 1.59%-in a sang tawh bawk.

Pass percentage-ah mipa sang zawk mah se, division hrang hranga zirlaite pass dan aṭanga chhûtin division sangah hmeichhia an tam zawk a; third division-a pass zat tih lohah chuan hmeichhia an tam zawk a, zirlai fail 4,837 zinga 2,170 (44.86%) chu mipa niin, hmeichhe fail 2,667 (55.14%) an awm thung.

Kumin HSLC exam-ah hian distinction-ah mi 1,332 an pass a, he'ng zinga 738 (55.41%) chu hmeichhia niin, mipa 594 (44.59%) an awm. First leh second division-ah pawh mipa aiin hmeichhe pass an tam zawk. Third division-ah kumina zirlai exam 18,561 zinga 2,921 an pass a, heng zinga 1,636 (56.01%) chu mipa niin, hmeichhia 1,285 (43.99%) an ni.