Minister-in result ṭha lawmna a hmanpui

Minister C Lalsawi­vunga chuan nimin khan a bial Aizawl South-I chhunga Central High School leh Bethlehem Vengthlang High School-te'n HSLC result ṭha an neih an lawmna a hmanpui.

C Lalsawivunga chuan, HSLC 2024-ah pass percentage 73.37% a nih laiin, a biala Bethlehem Vengthlang H/S-ah 83.67% leh Central H/S-ah 79.45% an pass chu ropui a tih thu leh a chhuan thu a sawi a, "Hlawhtling zawng zawng ka lawmpui a, an kal zelna turah duhsakna ka hlan. Zirtirtu leh zirlaite leh nu leh pate thawh rim rah a taka kan seng hi bialtu MLA nih tinuamtu a ni," a ti. La pass zo ve lote pawh beidawng loa zir zel turin a chah.

Zirlaite'n tum mumal neia lehkha an zir a pawimawh tih sawiin C Lalsawivunga chuan, "Zirtirtute pawhin career guidance ṭha kan pek fo a ṭul. Naupangte pawhin tumruhna kan neih a ngai," a ti a; Mizorama sorkar hnain a daih vek dawn loh avangin SSC hnuaia hna awmah inziak tling thei tura tun aṭanga inbuatsaih turin a chah.

Minister C Lalsawi­vunga hian a biala zirlai ti ṭha - pawl 10 leh pawl 12-a top 10-a langte chu lawmpui nan laptop a pe ṭhin a, kuminah pawh HSLC-a pakhatna Lalmoipuia Lawmzual, College Veng chu laptop a pe leh dawn a ni.