Thinghluna Mizopa thlam Assam mite'n an hal sak

Nimin chawhnu dar 2:45 vel khan Cachar DC hoin Assam Forest department leh Police-te'n Thinghlun, Mamit district-a John Zolawma thlám an hâl a, a kuhva kûng tam tham tak an tichhe bawk.

Thinghlun aṭanga Vanglaini thu dawn danin, Cachar DC leh District Forest Officer (DFO) hoin Forest leh Police mi leh sa mi 200 vel chu Zolawma leh Bendavida huanah an kal a; Zolawma thlám an hâl bakah, kuhva kûng eng emaw zat chu an tichhia a ni. Zolawma leh Bendavida hian Mizoram sorkar aṭangin an huan atan hian periodic patta an nei.

Covid-19 avanga inkhàrkhip ṭan tirh lai khan Thinghlun khua chuan Mizoram chin nia an ngaihah ramri hungna an siam a, chumi ṭum chuan Cachar DFO hoin Forest mi leh sate an rawn kal a ni. Mahse, ramria duty-te'n Covid-19 laiin thil dang an ngaihtuah hman loh thua chhángin, buaina awm zui loin an inṭhen a ni.

Chumi hnuah September 2020 khan Mamit DC tirhin SDO chu Thinghlun khuain ramri an hungna hmunah a kal a, Assam sorkar official-te nen an inbia a ni.

Assam lam mite chu hun eng emaw chen an rawn lan loh hnuah nimin khan an rawn lang leh a, thil awmzia sawi loin Zolawma thlám an hâl a, a kuhva kûngte an tichhe bawk.

Assam sorkar mite'n Zolawma huan leh thlám an khawih lai hian a piah lawkah Covid-19 vanga ramrîa duty an la awm reng a; mahse, mi 200 chuang an nih avang leh silai nena thawk an nih avangin an tan lo dan ngaihna a awm lo nia thu dawn a ni.

Assam mite hian tun hnai khan Vairengte leh Lailapur inkara Mizoram leh Assam inrìna báwr vel, ramri buai vanga a tu lam mah mahin kutthlak loh tura tih laiah in leh dawr 28 an sa thar nia thu dawn a lo ni tawh bawk. In an sakte chu NH-54 kawngpui kamah a ni a, in tam zawk chu an luah mek. In/dawr an sak zinga Vairengte hnaih ber chu kum 2007-a MZP-in Zo Rún an sakna chhak daih, auto-rickshaw stand thlang lawkah a ni.