GAC-in an hmunah harsatna an tâwk

Govt. Aizawl College (GAC) Students' Union chuan nimin khan Aizawl Press Club-ah thuthar thehdarhtute an kâwm a; Mualpuia an college hmun thar turah mimal ram (LSC) a lo awm avangin thubuai a awm a, harsatna nasa tak an tawk mek tih an sawi.

GAC SU hruaitute chuan, kum 2012-a Mizoram sorkarin land lease hmanga Mualpuia ram a pek tawh chu thui tak hmalak a nih tawh hnuah, college ram chhungah mimal ram (LSC) nei an lo awm avangin tun thlengin an la luah thei lo a, High Court-ah thubuai a awm a, harsatna an tâwk mek tih an sawi a ni.

Kum 2012 khan Mizoram sorkarin Mual­puiah GAC hmun tur ram sq.m 12471.50-a zau a pek thu sawiin GAC SU hruaitute chuan, "HTE Secretary hmingin land lease hmangin tihchhuah a ni. Hetianga ram tihfel a nih hnu leh ruahmanna thui tak kalpui a nih tawh hnu hian college ram tura ruahman chhungah mimal ram, LSC panga lai mai a lo awm tih hriat chhuah a ni," an ti.

LSC-te chu E Thang­khuma leh a chhungte hming veka tihchhuah a nih thu sawiin GAC SU chuan, "Salem Veng Local Council leh NGO-te'n an complain hnuah Land Revenue & Settlement department pawhin mipui vantlang ram tura ruahman chhunga awm a ni tih a lo tichiang tawh a ni," an ti a; LSC pangate chu hming thlak a la ni lo chungin Lalsangbera, Mission Veng chuan a neitu nia inchhálin harsat­na a siam thu an sawi.

GAC SU hruaitute chuan, LSC pangate chu thubuai inchiah lai mek, ram buai lai a ni tih hre chungin miin an lei lui nia hriat a nih thu sawiin, "GAC ramah hian cheng nuai 300 séngin commerce stream building leh cheng nuai 75 séngin Students’ Common Room leh cafetaria sak a ni tawh. Kum 2020-21 session aṭang hian Commerce building hi luah tura ruahman a ni," an ti.