Covid-19 vei naupang enkawl danah Sorkarin inkaihhruaina a tichhuak
Health & Family Welfare (HFW) department chuan, Covid-19 vei naupang kum 12 hnuai lamte leh rilru leh pianphunga rualbanlo, mahni inenkawl thei lote chu Covid-19 positive enkawlna hmuna an chhungte'n an awmpui chungchangah kaihhruaina, October 8, Ningani khan a tichhuak.
HFW department-in Standard Operating Procedure (SOP) a tihchhuah ang chuan, hripui vei naupang awmpuitute chu Covid-19 positive-te enkawlna hmuna an awm chhungin awm man leh ei leh in man (food & lodging) anmahni an intum a ngai.
Naupang awmpuitu turte chu enkawlna hmun an luh hma leh an chhuah dawnah swab sample endik hmasak tur a ni a, endikna senso chu anmahni an intum a ngai. Awmpuitute chu an positive ve palh a nih pawhin, inenkawlna leh a kaihhnawih senso zawng zawng an intum vek a ngai bawk.
Hetih lai hian, inenkawlna leh senso ngai dangte mahni intum tura sum leh paia harsatna tak tak nei (BPL, etc.)-te chu an awmna LTF/VTF hriatpuina lehkha anmahni bialtu chief medical officer (CMO) hnenah ngaihnathiamna an dil thei thung.
Naupang leh rualbanlo tana kaihhruaina
1. Covid-19 positive awmpuitu turte'n 'risk consent' sorkarin a duante uluk taka an chhiar hnuah witness-te hriatpuina hnuaiah an sign tur a ni.
2. Awmpuitu turte hi vulnerable group (e.g. kum 65 aia upa leh zunthlum, thisen sang, ashtma, cancer, etc. vei) an ni tur a ni lo.
3. Awmpuitu tur reng reng chu Covid-19 positive-te enkawlna hmun an luh hma leh an chhuah dawnah anmahni sensoin Covid-19 test an nei ngei tur a ni a, an negative chauhin chhuahtir an ni ang.
4. Awmpuitute'n enkawlna hmun an chhuahsan hnuah an negative a nih pawhin, ni sarih chhung in lamah an inkhung hrang tur a ni.
5. Naupang Covid-19 vei awmpuitute hian enkawlna hmuna an awm chhungin ei leh in awm man (food & lodging) an intum ang.
6. Awmpuitute hi Covid-19 positive enkawlna hmuna an awm chhungin páwn lama an chhuah phal a ni lo.
7. Positive awmpuitute hi naupang enkawl a nih chhung chu enkawlna hmunah an awm tluan tur a ni a, mi dang nen an inawm thlakthleng tur a ni lo.
8. Awmpuitute hian enkawlna hmuna an awm chhungin inkaihhruaina dan leh sorkarin Covid-19 chungchanga thupek leh inkaihhruaina a siamte ṭha takin an zawm tur a ni.
9. Covid-19 positive awmpuitute hi an lo positive ve palh a nih chuan inenkawlna leh a kaihhnawih senso zawng zawng an intum vek tur a ni.
10. Awmpuitute hian enkawlna hmuna an awm chhungin mi dang awm vete tana hnawksak leh him lohna thlen zawngin an khawsa tur a ni lo.
11. Covid-19 positive leh a awmpuitute'n counselling an dawng tur a ni.
12. Sum leh paia harsa tak tak (BPL, etc.)-te chuan an awmna LTF/VTF pawmpuina lehkha nen an ei leh in, awm man pek chungchangah bialtu CMO hnenah ngaihnathiamna an dil thei ang.