Kawng siam vûngin NH-06 a hnawh; District pahnih bawrhsapte'n hma an la

National Highway-06 kawngpui laitute'n an tihchhiat, Khawzawla Sapsakei Lamlian (Loch Road) chu an siamṭhat leh mai loh avangin Khawzawl Vengthar khawtlangin siamṭhain, lei an laihna vûngin a thlanga NH-06 kawngpui a hnawh ping. Hemi chungchangah hian Khawzawl leh Champhai bawrhsapte'n kawng siamtute an ko.

Thu dawn danin, Sapsakei Lamlian hi British Army officer Lt.Col. GH Loch-a'n Aizawl aṭanga Tuisenhnar (Khawzawl) - Champhai - Falam (Myanmar) inkalpawhna tura a siam a ni a, NH-06 kawngpui sial tharah kawng siamtute'n an tichhia a ni. Siamṭha tura kum hnih chuang an ngen hnuah pawh an siam­ṭhat loh avangin Khaw­zawl khawtlangin an siamṭha a, an siamṭhatna leivûngin a thlanga NH-06 kawngpui a hnawh ping a ni.

Khawzawl DC K Lalro­hlua'n May 18, Inrinni zing khan Sapsakei Lamlian laih mek vanga leivûng­in NH-06 a hnawh pin a enfiah. Champhai DC pawhin Inrinni vêk khan NH enkawltu National High­ways & Infrastructure Development Corporation Limited (NHIDCL) leh NH-06 siamtu leh enkawltu Shri Balaji Construction hotute a ko.

K Lalrohlua chuan, NHIDCL leh kawngpui enkawl­tu Shri Balaji Cons­truction aiawhte a ko a; Shri Balaji Construction-ah thu­tlukna siam thei an awm loh avangin NHIDCL Executive Director hnenah hma la turin lehkha a ziak nghal.

Shri Balaji Construction chuan leivûngin kawngpui a hnawh thian fai turin excavator (JCB) pakhat an tir a, hna an ṭan nghal. mahse, Khawzawl DC chuan Hitachi pahnih leh JCB pakhat a ngaih thu NHIDCL leh kawng enkawltute a hrilh.

Champhai DC James Lalrinchhana chuan Inrinni tlai dar 3 khan NHIDCL leh Shri Balaji Construction hotute DC Bangla-ah a ko a; harsatna thlenna hmun chu district dang ni mah se, Champhai district a nghawng avangin mipuiin harsatna an tawh loh nan hmalak nghal a ngaih thu a hrilh. Shri Balaji Construction thuneitu sang zawkte phone hmanga biain, harsatna chinfel dan tur a sawipui bawk.

Champhai Bawrhsap chuan, Khawzawl DC nen ruahmanna an siam dun a; Khawzawl Vengthar Joint NGO leh VC-te pawh Khawzawl DC-in ruahmanna siamte a hrilhfiah nghal bawk niin sorkar thuchhuahin a tarlang.

Ruahman dan chuan, Shri Balaji Construction-in vawiin aṭangin hna thawk ṭan thei turin excavator an thawh chhuahpui ang a, operator an neih remchan loh avangin Khawzawl DC-in a ngaihtuahsak ang. Leivûng paihna tur pawh Khawzawl DC-in a ruahman a ni.