TNT-ah Mental health Camp buatsaih

Mizoram State Legal Services Authority (SLSA) leh Mizoram University-a Department of Clinical Psychology chuan May 17, Zirtawpni tlai khan Thutak Nunpuitu Team, Muanna Vengah Mental Health Camp an buatsaih a, Gauhati High Court chief justice Justice Vijay Bishnoi, Mizoram SLSA patron-in-chief ni bawkin a hmanpui.

Justice Vijay Bishnoi chuan, TNT thil tihte ropui a tih thu leh a dintu Sangthankima fakawm a tih thu a sawi a, "Mizoram SLSA hi mi zawng zawngin rorelna dik an chan theihna tura dan chungchanga puihna a thlawna pe thei an ni a, rilru lama harsatna nei te, vohbikte leh mi hnuaihnung leh harsa dang tan programme tam tak an buatsaih tawh a, mipuiin kan hriat renga kan hman ṭangkai ngei ka beisei," a ti.

Mental Health Camp-ah hian Gauhati High Court judge leh Mizoram SLSA executive chairman ni bawk Justice Michael Zothankhuma leh TNT dintu Sangthankima te pawhin thu an sawi a; Gauhati High Court judge Justice Marli Vankung leh Mizoram SLSA hotute an tel bawk.