Ruihhlo do nan basketball-a inelna

Champhai District Basketball Officials (CDBBO) buatsaih JK Business Services Inter-Veng Junior Basketball Tournament on Ruihhlo Do chu May 18, Inrinni khan bawrhsap James Lalrinchhana, District Sports Committee chairman-in Vanlallawma Indoor Stadium-ah a hawng.

Bawrhsap chuan, ruihhlo donaa Champhai Sub-Hqrs YMA hmalakna ṭha a tih thu sawiin, "Mahni maiin ruihhlo a do hlawhtlin theih loh a, kan zavaia ṭanrualna avang chauhin kan do hneh thei," a ti a; infiammite chu ruihhlo donaah theihtawp chhuah turin a sáwm.

Champhai district chu ramri depa awm, ruihhlo tawlhna kawng a nih avangin ruihhlo eng emaw zat district chhungah thlauh a nih thu leh, ruihhlo chu ngaihthah theih a nih loh thu sawiin DC chuan, "Hun hman ṭhat leh hunbi vawn dik hi nun kawng hrisel zawhna atan a pawimawh a, hun kan hman ṭhata kan vawn dik phawt chuan ruihhloin kan nunah hmun a chang lo ang," a ti.

Hawnna inkhawmah hian Champhai Sub-Hqrs. YMA president F Lalrinmuana pawhin thu sawiin, basketball-a inelna buatsaih chuan ruihhlo donaah rah ṭha a chhuah ngei a beisei thu a sawi a; inelna ṭanpui nan Rs 15,000 a hlan.

Inter-Veng Junior Basketball Tournament on Ruihhlo Do-ah hian team pakua an tel a ni.