Kuminah ASF vangin vawk 1,834 thi tawh

Kuminah May 18, Inrinni thleng khan Mizoramah vawk pùl hri, African Swine Fever (ASF) kaihhnawihah vawk 1,834 a thi tawh. Vawk thi zinga 816 chu ASF vanga thi a ni a, vawk 1,018 chu hri darh zel tur vênna atana suat (tihhlum) a ni.

Animal Husbandry & Veterinary department chhinchhiah danin, ASF vangin kumin January 1 aṭanga May 18 thleng khan district paruka khua/veng 48-ah ASF vangin vawk thi leh suat 1,834 a awm tawh a; Aizawl district-ah vawk thi leh suat 1,228 awmin, a tam ber.

Aizawl district-ah vawk hri lênna hmun 36 a awm a, Mizoram puma vawk hri lên mekna hmun 48 aṭangin 75% tling. Inrinni thlenga Aizawl district-a vawk thi leh suat 1,228 chu Mizoram puma vawk thi leh suat zawng zawng 1,834 aṭangin 66.95% a ni.

Kumina ASF vanga vawk thi tamna ber khua - Dulte, Khawzawl district-ah Inrinni thleng khan vawk 145 a thi tawh a; Aizawl district-a Turiial khuaah ASF darh zel tur vên nan vawk 352 suat tawh niin, kumina vawk suat tamna ber khua a ni.