Speaker leh BRO hotu an inkâwm

Legislative Assembly speaker Lalbiakzama leh Border Roads Organisation (BRO) chief engineer GP Singh-te chu May 17, 2024 khan Speaker pisaah an inkâwm. Speaker chuan, India leh Myanma inrìna hrúlah kawngpui ṭha siam ṭul a tih thu a hrilh.

GP Singh chuan, Mizorama BRO hnathawhte a sawi bakah, an hmachhawpte leh Mizoram sorkar tana ruahmanna an neihte a sawi a; Lalbiakzama chuan, Mizoram tana BRO hnathawhte chhuanawm a tih thu sawiin, tun aia nasa zawkin hmalakna zauh zel turin a chah.

Lalbiakzama chuan, India leh Myanma inrìna hrûlah kawngpui ṭha, civil highway standard-a siam ṭul a tih thu a lo hrilh a; Mizoram kawngpui ṭhenkhat chu Mizoram PWD nena inhlan chhàwn theih dan a awm leh awm lohte zirho a, Mizoram sorkar thuneitute nena sawiho ṭha a tih thu a sawi.

Assembly Speaker chuan, Mizoram hmasawnna hna thawhah sorkar laipui hmanrua (agency)-te'n harsatna an neih chuan puih an inhuam reng thu a sawi a; "Mizorama kawngpui siam hi ram dang aiin a hautak bik a, kan leilung a thàwl bakah leimin a tam a, kan leilungin a zir loh vangin kawngpui tlo neih a har hle," a ti a, Mizoram dinhmun azirin ngaihtuahna hmang nasa lehzual turin a chah a ni.