Vawiin aṭangin tiam chin awm loin Sumdawnna lirthei an tlân dawn lo
Commercial Vehicle Joint Action Committee (CVJAC) bultumin Mizoram pumah vawiin zing dar 5 aṭang hian tiam chin awm loin sumdawnna lirtheite an tlan dawn lo. CVJAC hian an thil phût sorkarin a tihhlawhtlin loh avangin lungawi lohna an lantir dawn a ni.
CVJAC hruaitute hnen aṭanga thu dawn danin, an thil phût chungchangah nimin khan Transport minister John Rotluangliana hoin a pisaah Transport department hotute nen an inbia a; an inbiaknaah hian thu lawmawm an hmuh loh avangin, vawiin aṭanga tiam chin awm loa lungawi lohna lantir tura ruahmanna an lo siam tawh chu an kaltlangpui dawn a ni.
Transport Minister hoa meeting-ah an thil phut point 10 zinga point pahnih/khat bakah an thu a inhmu thei lo tih sawiin CVJAC hotute chuan, "Kan thil phûtte hi a hlawhtling dawn chuang loin kan hria," an ti. CVJAC hruaitute chu Transport Minister nen an inbiakna ngaihtuah hian nimin tlai khan an ṭhukhawm nghal.
CVJAC hotute chuan, lirthei permit thlak (replacement) phal loh chu Transport Minister chuan dan ni loin, an party manifesto a ni thu a sawi niin Vanglaini an hrilh a, 'Púte thutlukna a nih avangin ka tidanglam thei lo' tia a chhan thu an sawi.
Sumdawnna lirthei tlan an awm lohna atan zing dar 5 aṭang hian CVJAC kaihhruaina hnuaiah hmun hrang hrangah duty an insiam dawn a; state páwn aṭanga Mizorama rawn lut turte chu Kolasib leh a chhehvelah an tangkhang lohna atan Mizoramah rawn lut hrih lo turin hriattir lâwk a ni.
CVJAC chuan, "Lungawi lohna lantir chhung hian bawlhhlawh paih motor emaw, dawr bungaw sem motor leh mimal thil atana hman, sumdawnna lirthei anga registration hmangte pawh tlân chhuah loh tur a ni a, tlân lui an awm chuan harsatna leh buaina an tawh pawhin anmahni mawhphurh a ni ang," an ti.
Chutih laiin, sumdawnna lirthei tlân lo tura tih hian emergency thil, bawnghnute phur, medical duty turte a huam dawn lo a; innei, lungphun, chhiattawhna, leh ṭul bikah chuan phalna lak theih a ni thung.
CVJAC bultum hian March 1, 2016 khan Mizoram pumah lungawi lohna lantirna atan sumdawnna lirtheite an tlan lo tawh a, chief secretary Lalmalsawma nen an inbiak hnuah lungawi lohna lantir an titawp. CVJAC hian an duh ang thu lawmawm an hmuh loh avangin April 4, 2016-ah lungawi lohna lantir an tum leh a, mahse Chief Minister nen an inbiak hnuah an ṭhulh leh a ni.
CVJAC thil phûtte chingfel tur hian Transport Secretary kaihhruaina hnuaiah Committee din a ni a, Committee hian lirthei pawl hrang hrangte a kâwm tawh a ni.
CVJAC lungawi lohna Ṭhenkhat
4 Replacement-in motor a tam phah lo chunga tih phal loh a ni chu an duh lo. Hei hi inthlan hma party manifesto telh a ni loin an hria.
4 All Mizoram permit tihtawp an duh lo a, tihtawp an duh.
4 Intlân chhâwk chungchangah an hmakhua tur chu anmahni rel fel an duh.
4 Auto-rickshaw kawngkhar dinglam pin an duh lo.
4 Special permit kalpui dan chu awmze nei lo leh ṭul loah an ngai.
4 Aizawl by-pass road, Bawngkawna motor lian No Entry awm hlih an phût.
4 Tax sang taka an chawi avangin rate siam-
ṭhat vat an phût.
4 Maxicab service-te motor hlui tawh thlak theih leh route bik pawn lama tlan phal lohna sût an phût.
4 Permit thar pek tawh loh an phût.
4 Truck-te chhiah chawi Rs. 2,900 aṭanga Rs. 7,500-a tihsan an duh lo.