Minister pathumin MZU-ah Building pathum an hawng

Mizoram University (MZU)-a Department of Management, Health Centre leh School of Education & Humanities building tharte chu, nimin khan minister pathum - R Romawia, Zodintluanga leh Lal Thanzara ten an hawng.

Building hawnna puala inkhawm buatsaih chu MZU vice chancellor Prof. R Lalthantluanga'n a kaihruai a; R Romawia chuan, "Tunlai khawvel inelna sang tak karah inrêlbâwlna fel tak tel lo chuan hmasawn a har. Mahni eizawnnaa hlawhtling tur chuan management kan thiam hle a ngai," a ti a; MZU-a zirlai leh thawktute chu zirna boruak muanawm vawng nung zel a, university chu politics lam rawng kaia hmang lo turin a chah.

Zodintluanga chuan, hmasawnna ruhrel ṭha tel lo chuan hmasawn a har thu sawiin, "Mizoramin India rama football kan champion pui theih chhan pawh infiamna lama hmasawnna ruhrel ṭha kan duan vang a ni," a ti.

Hriselna lama infrastructure ṭha leh doctor thiam leh thawktu ṭha tak MZU-in a nei chu lawmawm a tih thu sawiin Lal Thanzara chuan, "Harsatna in tawh chángin inthlahrung loin min pun ṭhin ang che u," a ti a; zirlaite chu ram leh hnam tana thawktu bakah, MZU-ah vek zirtitute an la nih dawn avangin tih tak zeta zir turin a chah.

MZU Department of Management building hi sq.m. 4,000-a zau niin, cheng vbc. 9.58 sêngin Augus 31, 2015 khan sak zawh a ni. School of Education & Humanities building chu sq.m. 3,300-a zau, cheng vbc. 8.35 sênga March 3, 2015-a sak zawh a ni a; Health Centre chu sq.m. 710-a zau, cheng vbc. 2.64 sênga August 12, 2015-a sak zawh a ni thung.