Synod-in upate inkawm hlimna a siam

Mizoram Synod chuan Synod Conference Centre, Mission Vengah kum upate inkawm hlimna tur a siam thar a; upaten kal nachang an hre ṭan.

Synod-in upate inkawm hlimna tur (Old Age Care Centre) a siam hi kumin May thla tirah ṭan a ni a; anmahni lo buaipui enkawl turin mi pahnih, mipa leh hmei-chhia pakhat ve ve dah an ni.

Centre hi Pathianni tih loh ni tin hawn a ni dawn a, chawhma dar 10:30 aṭanga tlai dar 3 thleng hawn ṭhin a ni ang.

Old Age Care Centre atana hriat tur tihchhuahah chuan, inkawm hlimnaa tel turin kum bithliah a awm lo a, a duh apiang tan pan theih a ni a, a kal tur tan sum sen ngai a awm lo.

Kalna leh hawna senso erawh mahni emaw, chhungte emaw, an awmna tualchhung kohhranin an tumsak a ngai thung.

Centre-ah hian Synod tumin ei leh in tur chhawp a ni a, chanchinbute leh intihhlimna tur (infiamna hmanrua) chi hrang hrang dah a ni bakah, mutzàlna tur khum dah a ni.

Old Age Care Centre-a thawkte chuan, Centre chu miin an la hriat tam loh avangin tlawhtu pawh an la tam tawk lo tih an sawi a, hun kal zel turah erawh chuan upate'n an la bawh viau an beisei thu an sawi.