MBBS leh BDS-a Mizoram quota Hnawhkhah dan tur a la chiang lo

Bachelor of Medicine, Bachelor of Surgery (MBBS) leh Bachelor of Dental Surgery (BDS)-a sorkar laipui hnuaia Mizoramin quota a neihte hnawhkhah a nih dan turah thutlukna mumal a la awm lo. Supreme Court chuan MBBS leh BDS zir tur hian National Eligibility & Entrance Test (NEET) paltlang a phût a ni.

'MBBS leh BDS-a Mizoram sorkar quota hnawhkhat tur khawp Mizo zirlai zingah NEET paltlang awm lo se engtia kalpui tur nge?' tih zawhna chhangin, Higher & Technical Education (HTE) depart-ment hotute chuan, "Thu chiang kan la hre bik lo. Sorkar laipui chuan HTE Minister-te a kokhawm a, an thuchhuakte pawh ngaihchân phawt a ngaih kan ring," an ti.

Sorkar laipui chuan medical line-a Mizoramin quota a neih zat tur an la tichiang lo bawk a. Kum 2015 khan Mizoram sorkar chuan MBBS-ah quota - Central pool-ah 25 leh NEC-ah pathum, BDS-ah quota Central pool-ah pathum leh NEC-ah pasarih a nei a ni.

NEET hi May 1, 2016 khan a thawh khatna buatsaih a lo ni tawh a, zirlai 6,50,000 chuangin an hmachhawn.

Supreme Court-in MBBS leh BDS zir tur tan NEET paltlang a ngai a tih leh tâk avangin NEET Phase-II chu July 24, 2016-ah buatsaih a ni leh dawn a, Phase-I leh Phase-II result chu a rualin August 17, 2016-ah tihchhuah a ni ang.

Hetih lai hian, Mizoram sorkara HTE department chuan May 24, 2016 hian MBBS leh BDS ni lo, technical course danga Mizoram quota-a zir tur thlanna atan State Medical & Techincal Examination (SMATE) a buatsaih dawn. HTE hotute chuan, MBBS leh BDS zir tumte chuan NEET leh SMATE exam ve ve se tun dinhmunah chuan thil ṭha ber nia an hriat thu Vanglaini an hrilh.