Mipui himna ngai pawimawh turin MPCC-in sorkar an phût

Mizoram Pradesh Congress Committee (MPCC) chuan nimin khan thuchhuah siamin, MNF kaihhruai sorkar chu party aia Mizoram mipui himna leh hriselna ngai pawimawh zawk turin an phût.

MPCC chuan, Covid-19 hripuiin Mizoram mipui a tih chî-ài vanglai tak, hri kai pawh mi 218 an awm lai, August 5, 2020-ah VC leh LC inthlan hun State Election Commission (SEC)-in a puang tih sawiin, "Political party-te leh mithiamte'n inthlanah hri inkai darh a hlauhawm thu an sawi a, MPCC president Pu Lal Thanhawla pawhin inthlan sawn hla tura ngenna SEC-ah a thehlut chungin, MNF sorkar chuan VC leh LC inthlan min kaltlangpui lui a ni," an ti.

Congress party chuan, August 27-a LC leh VC inthlan rûnpui neih laia Mizorama hripui vei hmuh tawh zat chu mi 974 an nih laiin, October 1-ah chuan mi 2018 an tling tawh tih sawiin, "Inthlan avang hian hri kai miah lo tura ngaih election official leh mi tam takin an kai phah a ni," an ti a; Sorkarin inthlan a tih luih avangin mi tam tak an inkhung a, hna an thawk thei lo a, Aizawlah lockdown puan a ngaih phah thu an sawi.

MPCC chuan, MNF sorkarin hripui darh nasat laia VC/LC inthlan an kalpui luih laiin, MNF National Core Committee (NCC), Zoramthanga hoa October 5-a inhmukhawm chuan Covid-19 léng vangin block hruaitu inthlan rih lo an rél tih sawiin, "MNF kaihhruai sorkar hian an chan ṭhatna chauh thlira mipui hriselna leh himna pawisa loa LC leh VC inthlan an kaltlangpui luih laiin, an party himna atan inthlan an ṭhulh leh si hi kan dem tak zet a ni," an ti.