V/C bye-election turah campaign hun a tawp

Mizoram hmar lam khaw 31-a naktuka village council inthlan turah inbuatsaihna peih thawkhat a ni tawh a, nimnin tlai dar 4 khan campaign hun a tawp. V/C inthlan tibuai thei thil tun thlengin a awm hriat a ni lo.

V/C thlanna turte chu Aizawl district-ah V/C 25 - Daido, Damdiai, Khawlian, Khaw-puar, Làmherh, Lungsum, Mauchar, N. Khawdungsei, North Khawlêk, North Ṭing-hmun, NE Tlangnuam, New Vervek, Palsang, Phuaibuang, Ratu, Sailutàr, Sakawrdai, Sun-hluchhip, Thingsât, Vaitin, Suangpuilawn Van-bâwng, Záwngin, Zohmun leh Zokhaw-thiang-te a ni a; Kolasib district-ah khaw panga - North Chawnpui, Phainuam, Saiphai, North Hlimen, Saihapui-V leh Saipùm-te a ni.

Thu dawn danin, V/C inthlan turah hian candidate 408 an awm a; chu'ng zinga 322 chu Aizawl district-a khaw 25-a V/C seat 99 chuh turte niin, candidate 99-te chu Kolasib district-a khaw paruka V/C seat 26 chuh turte an ni.

Aizawl district-a V/C 25-a seat 99 chuh tur candidate-te chu - Congress party aṭangin 98, MNF aṭangin 84, BJP aṭangin 40, ZNP aṭangin 19, MPC aṭangin pakhat leh independent 80 an ni. Kolasib district-a V/C paruka seat 26 chuh tura candidate an neih dan chu - Congress party 26, MNF 24, BJP 10, ZNP pariat, HPC 13, MPC pahnih leh independent 13 an ni.

Aizawl district-a khaw 25-ah vote nei mi 15,743 an awm a, Kolasib district-a khaw parukah vote nei 4,493 an awm.

Thu dawn danin, inthlan turah hian bo-ruak muanawm lo a awm lo a, boruak rálmuang tak hnuaiah inthlan theih beisei a ni.

Kolasib DC H Lalengmawia leh SP C Lalzahngoa te chuan an district-a inthlanna tur khaw parukte chu an tlawh tawh a, boruak awm dan an enfiah. Inthlanna felfai leh thianghlima tak neih a nih theihna atan thil pawimawh leh ṭul nia an hriatte returning officer-te an sawipui.

V/C bye-election neih ni, May 19 chu inthlan neihna tur khuaa mite tan Mizoram Governor chuan Negotiable Instrument Act, 1881 tlawhchhanin chawlh a puang a ni.