HCDC-in truck driver-te an dem

Hachhek Constituency Development Committee (HCDC) chuan May 11, 2016-a Saikhawthlir khaw bul Teirei lei vengtu duty leh Mizoram Truck Driver's Association (MTDA) member-te intihthiam lohna kal zelah MTDA chu Hachhek bial mipuite beiah puhin, inhmuhsitnaa an ngaih thu an puang.

HDHC hruaitute chuan nimin khan Mamit Sub-Headquarters pisa, Mamitah thuthar theh-darhtute an kawm a, Lal-zawna pachuau-in a kai-hruai. MTDA member-te chu phal zat aia rit phur chunga Teirei lei zawh tum luiah an puh a, an chungah action la turin sorkar an phût a ni.

HCDC chuan, MDTA-in Mizoram khaw-thlang lama buhfai phurh tawh loh an rêl chu sût leh ngei se an duh thu sawiin, "Tun hnuah MDTA hian thutlukna an siam dawnin ngaihtuah chiang hmasa tawh se. Hemi chung-changah hian a ṭul angin hma kan la zel dawn a, dan bawhchhiat tumna reng reng a tàwp thlengin kan do tlat dawn," an ti.

Hetih lai hian, Saikhawthlir V/C leh YMA hruaitute chuan, kut tuar-tu driver-te leh MTDA hruaitute hnenah ngaihdam dil tumin driver pakhat an bia a, thupha an chawi thu an hrilh a; driver chuan MTDA President phone number a lo pe a, mahse President chu an be tlang thei lo. MTDA hruaitute chu an naute thiam lohna thup bo a, Saikhawthlir mipuite demna thu chhuahah an puh a ni.

Teirei leia duty Stephen Lalawmpuia sawi danin, truck pangate Teirei lei an thlenin challan an hmuh a, chutah chu balu cubic metre 5 (lei zawh thei chin) an phur tih tihchianna turin receipt an hmuh a; mahse balu chu an tehnaa cubic metre 5 aiin a tamah a ngai a ni. Driver-te chuan Rs. 200-300 diat diat pea kaltlangtir turin an ngen a, mahse a phal lo niin a sawi.

HCDC chuan Stephen Lalawmpuia chu thamna la duh lo leh driver-te'n an thlem chung pawha Teirei lei venghimtuah ngaiin, chawimawi nan thang-chhuah diar an hlân a ni.