Rangkachak rûkbo thubuai MPC-in CBI chhuitir duh

MPC party chuan thuchhuah siamin, Mizorama rangkachak cheng vbc. 14.5 vel hû tawlhrûk suam leh rûkbo thubuaia Mizoram police-te hna thawh tawh chu chhuanawm an tih thu an tarlang a; chutih rualin, Central Bureau of Investigation chhuitir ni se an duh thu an sawi.

MPC chuan, rangkachak tawlhruk, suam leh rûkbo thubuaiah officer lian tak tak leh mi hausate an inrawlh tih a chiang nia sawiin, "Assam Rifles commandant bakah thiltithei tak tak leh hausate an inrawlh kual nasat hmela a lan avang hian, kan police-te kan rin tawk loh vang ni loin, political pressure vanga harsatna a awm hlauhthawn thuah he case hi CBI-in la mai se kan duh a ni," an ti.

MPC party chuan, kum eng emaw zat liam tawhah Lawngtlaia bank rawk thubuai pawh Mizoram police-te'n ṭha takin an chhui a, thil sual titute pawh an chhui chhuak ngeia an hriat laiin, a tâwpah a zûzî leh si nia sawiin, pawi an tih thu an sawi a; rangkachak rukbo thubuai pawh a zûzî leh mai an hlauh-thawn avangin CBI-in chhui se an duh thu an tarlang a ni.